.png)
Edi Rama i dha të drejtë Albin Kurtit në vendimin për reciprocitin e targave me Serbinë, ndërsa fluturimet e helikopterëve e avionëve serbë në kufirin me Kosovën në veri tha se “nuk mbrojnë serbët e Kosovës, ashtu siç pretendohet, por është shfaqje teatrale për konsum të brendshëm propagandistik në Serbi”.
Në këtë qëndrim, Rama tha se Shqipëria nuk ka asnjë dyshim.
“Qëndrimi i Shqipërisë, i qartë dhe i drejtë, i pandryshuar. E drejta këtu është me Kosovën dhe pikë. Serbia nuk ka asnjë të drejtë që të kthejë targat në një përditshmëri konfliktuale, duke e bërë mizën buall. Kosova e ka fituar luftën dhe ata helikopterët që vijnë vërdallë atje janë vetëm për efekt propagandistik të brendshëm në Serbi. Serbët në Kosovë jetojnë të pakërcënuar nga askush, madje u paguhen edhe faturat e energjsië elektrike nga qeveria e këtij shteti këtu, si askund tjetër në botë ”, tha Rama.
Megjithatë, Kryeministri i Shqipërisë u shpreh se edhe shfaqja e forcës nga ana e Kosovës në veri duhet bërë me kujdesin si për të mos cenuar raportet me partnerët ndërkombëtarë, ashtu edhe për të mos u kthyer në një “boomerang”, siç tha se u kthye taksa e famshme 100 për qind për mallrat serbe.
“Dërgimi i forcave speciale të Kosovës në veri duhet bërë me kujdes që të mos cenojë marrëdhëniet me partnerët ndërkombëtarë. Kjo është një mundësi e mirë për të treguar edhe një herë gatishmërinë për dialog të barabartë dhe për ta çuar dialogun në nivel të ri edhe me mbështetjen e miqve dhe partnerëve të Kosovës. Mos harrojmë se taksën 100 për qind. U mor si masë për të ngritur një problem për moszbatimin e marrëveshjeve nga Serbia, por u lidh si litar në këmbët e Kosovës duke u bërë një problem edhe më i madh edhe se vetë problemi i për të cilin u vendos për ta ngritur”, tha ai.
Kryeministri Kurti nga ana tjetër u shpreh se është në kontakt të vazhdueshëm me partnerët ndërkombëtarë dhe me KFOR-in. Ai tha se Kosova e lexon këtë çështje si problem të sigurisë së brendshme dhe jo të jashtme.
Sa i takon pranisë së forcave speciale në veri, Kurti u shpreh se ajo është e detyruar për të mbrojtur policinë kufitare të Kosovës në zbatimin e vendimit për reciprocitetin e targave. Kurti tha se ka pasur sinjale dhe indicie se në rast se në Jarinjë dhe Bërnjak nuk do të ishin forcat speciale të Kosovës, atëherë pikat kufitare atje do të ishin djegur nga serbët.
“Njësia speciale e Kosovës nuk është në Jarinjë dhe Bërnjak për t’u gëzuar kësaj situate. Kanë për detyrë që të mbrojnë pikat kufitare dhe policët kufitare. Po të mos ishte njësia speciale, policët tanë kufitarë dhe godinat aty do të ishin të rrezikuaar seriozisht. Ku është Policia e Kosovës nuk ka dhunë”, u shpreh Kurti.
Si zgjidhje, Albin Kurti parashtroi edhe njëherë propozimin e bërë më herët. “Të dyja palët të heqin targat e përkohshme dhe hajde të bëjmë një hap përpara për të lehtësuar lëvizjen e qytetarëve”, tha ai.
Ndërkohë, i pyetur nga gazetarët nëse kishte biseduar me Presidentin serb, Aleksandër Vuçiç në lidhje me situatën e krijuar në veri, Edi Rama tha "jo". Ai deklaroi se nuk kishte për çfarë të negocionte me të, përsa kohë e drejta në këtë rast qëndron me Kosovën.
“Nuk kam pasur komunikim me Presidentin Vuçiç. Nuk ka asgjë për të negociuar. Jemi në kushtet kur e drejta është më Kosovën dhe kjo është e qartë. Jemi në krah të Kosovës, siç është i gjithë komuniteti ndërkombëtar dhe leximi i çuarjes së njësive speciale atje për teatër me helikopterë dhe aeroplanë nga Serbia është shumë i gabuar”, tha Rama.
Rama tha gjithashtu se nuk “e kuptonte se ç’donte ambasadori rus në kufirin mes Serbisë dhe Kosovës”. “E imagjinoni ju sikur të shkonte Ambasadori amerikan te forcat speciale në veri?”, u shpreh ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
