.png)
Socialistët mblodhën sot Kryesinë e PS-së, e para pas zgjedhjeve lokale të 30 qershorit, për të diskutuar mbi aksionin politik që do të ndërmarrë, pas fitimit të 61 bashkive nga socialistët.
Të mbledhur në ora 10:00 të ditës së sotme, socialistët kanë biseduar mbi çështjet organizative që kanë bëjnë me kryerjen e analizave pas zgjedhjeve në çdo degë të PS-së dhe organizatë socialiste. Pavarësisht se rezultati cilësohet i mirë publikisht, nga PS-ja për kushtet se si u zhvilluan zgjedhjet lokale pa opozitën, është urdhëruar nisja e analizave dhe nisjen e procesit të zgjedhjeve brenda PS-së.
Më 22 Korrik është vendosur që të mbahet Asambleja e PS-së ku do të diskutohet për zgjedhjet dhe për natyrën organizative të socialistëve. Pas mbledhjes Rama u shpreh se ishte për të realizuar Kongresin Zgjedhor të PS-së, çka nënkuptonte përgatitjet për zgjedhjet e ardhshme parlamentare, që sipas tij do të mbahen sipas parashikimeve.
“Kemi bërë një diskutim mbi gjithë pasqyrën e 30 qershorit. Kemi parë më kujdes çdo qark, çdo bashki. Kemi diskutuar për mbledhjen e Asamblesë Kombëtare ku sigurisht do të flasim për çka është bërë dhe çka do të bëjmë në vijim pas pushimeve. Gjëja më e rëndësishme është që kemi hapur një diskutim për ta çuar në një nivel tjetër organizimin tërësor të PS në funksion të marrëdhënieve më të hapura dhe më efektive me çdo komunitet në funksion të harmonizimit të linjës sonë politike me mirëfunksionimin e bashkive dhe pa diskutim në funksion të një qëndrimi të qartë që kemi mbajtur dhe gjatë fushatës në çdo bashki që deri dje është qeverisur nga e djathta për të ndërtuar një proces solid në raport me administratën për të mos shfaqur asnjë tendencë tradicionale prej "pushtuesish" në këto bashki, për të respektuar të gjithë ata që punojnë në këto bashki, për të mos prekur asnjë grua apo vajzë që figuron në administratën bashkiake dhe për të pasur transparencë maksimale në të gjitha lëvizjet që mund të jenë të nevojshme. Jo në funksion të një spastrimi politik, por në funksion të meritës”, deklaroi Rama pas mbledhjes së Kryesisë.
Sipas tij në shtator do të ketë zgjedhje në PS, duke ripërtërirë strukturat. “Patjetër do të hyjmë në proces zgjedhor. Duke filluar nga Asambleja, të gjithë organizatat, forumet do të rizgjidhen nga Kongresi i ri Zgjedhor i PS”, shtoi kryesocialisti, i cili bëri të ditur se Asambleja do të mbahet më 22 Korrik.
S’ka ndryshime në qeveri
Kryeministri hodhi poshtë mundësinë e ndryshimeve në qeveri për kundër atyre që kishte deklaruar në asamblenë e dhjetorit 2018, ku kishte paralajmëruar dy ministrat Blendi Klosi të Mjedisit dhe Turizmit, si dhe Ogerta Manastirliu e Shëndetësisë. Ai nga Asambleja e dhjetorit ku shpalli ndryshimet drastike në qeveri u dha afat deri në qershor për të përmirësuar rezultatet e punës.
“Nuk ka ndryshime në qeveri, janë fantazi që burojnë dhe nga temperaturat e larta. Nëse detyrat janë bërë, nuk ka nevojë për ndryshime. Nuk kemi pasur prioritet në zgjedhjet e 30 qershorit rezultatin, por procesin. Tani kemi të dhëna të bollshme për të vijuar më tutje duke parë nga vetja. Dimë potencialet që kemi, kemi ende shumë rezerva dhe shumë për të përmirësuar në të gjitha nivelet”, theksoi Rama.
Ai iu shmang faktit se një gjë të tillë kishte deklaruar në Asamblenë e shkuar se do të ndërmerrte ndryshime të tjera në Qeveri. Lëvizja e Ramës pritet të mos jenë këto ndryshime në qeveri, por ndërhyrja në strukturat e PS-së.
Komenton “sms” e Metës për eliminimin e PD dhe LSI
Kryeministri Rama ndërkaq ka komentuar edhe deklaratat e presidentit Ilir Meta mbi mesazhet që i dërgoi në telefon ku i ka deklaruar se nuk do të ekzistojnë as LSI dhe PD pas zgjedhjeve. Këto mesazhe Meta i bëri publike në konferencën e 2 korrikut, ku i cilësoi si kërcënime të kryeministrit.
“Për fat të keq të atyre që ende e besojnë këtë opozitë, nuk ka nevojë për plane për të eliminuar opozitën sepse është në kapacitetet të plotë për tu vetëeliminuar. Procesi vijon në një rrugë që e kanë zgjedhur vetë qorrazi. E rëndësishme për ne është ti qëndrojmë besnik të gjithëve, atyre që na votuan, por edhe atyre që s’na votuan. Këto historitë 7 here 7 bëjnë 42, ia kemi lënë opozitës. PS e kandidatët kanë marrë mbështetje përtej çdo pritshmërie, dhe mbi këtë bazë kemi nis punën për fitoren e radhës në 2021” u shpreh Rama.
Duke komentuar braktisjen e votimeve të 85% të votuesve, Meta u shpreh se “kam thënë që do të ndëshkohen nga vetëpërjashtimi dhe në procesin e vetëvrasjes do të bërtasin fitore dhe siç e shikoni po bërtasin fitore. Fitore të tilla paçin gjithmonë, ajo që mbetet është rezultati”.
Presidenti Meta publikoi një mesazh telefonik ku sipas tij, Rama kishte bërë të ditur se LSI nuk do t’i mbetej asnjë gjurmë.
“Shikoni çfarë më shkruan, sepse nuk e kam zakon të nxjerr mesazhe, por do fillojmë t’i nxjerrim këto punë. Do i çojmë dhe arkivit të shtetit ca dokumente që t’i ketë për historik. Më 18 shkurt dy ditë pas 16 shkurtit kryeministri i shkruan presidentit të Republikës, meqë Luli dhe Mona kanë thënë se do djegin mandatet. Ja sms e Ramës: "Lulit i kam shkruar në fund të vitit 2017 se pas zgjedhjeve lokale nuk do të jetë kryetar partie e ka gjet kryetaren, ndërsa ty po të shkruaj sot që pasi të mbarosh mandatin si President nuk do të gjesh më gjurmë LSI-je. Mbase jam gabuar, por më pëlqen të bëj parashikime mbi bazën e analizave të mija dhe përtej të tjerave sinqerisht më vjen keq”, do të deklaronte Meta.
Sa i përket shkarkimit të Presidentit, për socialistët ajo tashmë duket se ka një prioritet dhe se i gjithë aksioni politik është fokusuar te vendimi që do të pritet të merret në shtator, pas nxjerrjes së raportit të komisionit hetimor parlamentar.
Por a ka PS-ja një emër për presidentin e ri? Për Ramën kjo gjë duket ende e parakohshme. “Nuk është në rendin e ditës. Unë jam gjithmonë 3 lëvizje përpara. Lëvizja e radhës është procesi që ka nisur në Parlament”, theksoi lideri i socialistëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
