Pyetja më e zgjuar që duhet të bëni në një intervistë pune

Në një intervistë pune, pyetjet që bëni janë po aq të rëndësishme sa përgjigjet që jepni.

Pyetjet e zgjuara dhe të menduara në fund të një interviste, mund t’ju ndihmojnë të dalloheni nga kandidatët e tjerë dhe të vendosni nëse një pozicion është i përshtatshëm për ju.

"Ka një pyetje, në veçanti, që shkon drejt e në zemër të asaj që kërkon një menaxher punësimi", thotë Bert Bean, CEO i firmës së personelit Insight Global.

“Dëshiroj të sigurohem se përshtatem me atë se si perceptohet suksesi këtu. Cilat janë tre tiparet kryesore që shfaqin performuesit tuaj më të mirë, ditë pas dite, në këtë kompani?”

Bean ka intervistuar qindra kandidatë për punë gjatë karrierës së tij si rekrutues i kthyer në CEO.

Me këtë pyetje, shpjegon ai, ju po i tregoni një menaxheri të punësimit se jeni i ndërgjegjshëm dhe i motivuar.

“Duke pyetur se si perceptohet suksesi brenda një ekipi ose kompanie, ju po tregoni se jeni një fitues dhe dikush që dëshiron të mësojë, se cilat aftësi do t’ju ndihmojnë të shkëlqeni në një rol,” thotë Bean.

Me këtë pyetje, ju gjithashtu do të kuptoni më mirë se çfarë lloj cikli të të mësuarit do të përballeni dhe si do të vlerësohet performanca juaj.

Në fund të intervistës, pasi të keni shqyrtuar të gjitha pyetjet, duhet ta përfundoni bisedën me një “fjalim” prej 30 sekondash, që i “shet” menaxherit të punësimit se pse jeni i përshtatshëm për këtë rol, thotë Bean.

Ai rekomandon skenarin e mëposhtëm për të prezantuar veten:

“Nuk kam pyetje të tjera, por nëse mund ta them këtë me përulësi, ja pse duhet të më punësosh mua.”

Kjo taktikë është kaq efektive, shpjegon Bean, sepse arrin në thelbin e asaj, që çdo intervistues dëshiron të dijë: A jeni personi më i mirë për këtë punë?

Në fund të fundit, sekreti për të bërë çdo intervistë pune është i thjeshtë, shton ai:

“Duhet të shesësh veten me sinqeritet”.

Burimi: CNBC/ Përshtati: Gazeta "Si"

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.