Publikohet drafti i negociatave për Shqipërinë dhe Maqedoninë e Veriut

Komisioni Europian ka paraqitur draftin e kornizës së negociatave për Shqipërinë dhe Maqedoninë e Veriut, duke përcaktuar udhëzimet dhe kriteret për bisedimet e tyre të pranimit. Komisioni ishte i ftuar t’i paraqiste këto propozime marsin e këtij viti kur Këshilli i Çështjeve të Përgjithshme mori vendimin e hapjes së bisedimeve me të dyja vendet.

Komisioneri i zgjerimit Olivér Várhelyi bëri publik lajmin në Tëitter duke e cilësuar si një tjetër hap të rëndësishëm në rrugën e Shqipërisë dhe Maqedonisë së Veriut drejt Bashkimit Europian. “Duke i qëndruar angazhimit tonë, ne po paraqesim udhëzime konkrete për zhvillimin e negociatave të pranimit”, ka shkruar ai.

Varhelyi theksoi se propozimet bazohen në metodologjinë e rishikuar të zgjerimit, e cila u paraqit në muajin shkurt, ndërsa shtoi se e ardhmja e të dy shteteve është padyshim në BE. Korniza e negociatave përcakton udhëzimet dhe parimet në bisedimet e anëtarësimit me secilin vend kandidat. Drafti ndahet në tre pjesë: parimet që rregullojnë negociatat e pranimit, përmbajtja e negociatave dhe procedura e negociatave.

Ai është e përqendruar tek reformat themelore, duke filluar me sundimin e ligjit, funksionimin e institucioneve demokratike dhe administratën publike, si dhe ekonominë e të dy vendeve. Propozimet parashikojnë gjithashtu një udhëheqje më të fortë politike të procesit, dhe më shumë dinamizëm duke organizuar kapitujt negociues në grupimet tematike.

"Sot shënohet një hap tjetër i rëndësishëm në rrugën e Shqipërisë dhe Maqedonisë së Veriut drejt Bashkimit Evropian. Duke ofruar angazhimin tonë, ne përshkruajmë korniza konkrete për zhvillimin e negociatave të pranimit. Propozimet tona bazohen në metodologjinë e rishikuar të zgjerimit që kemi paraqitur në shkurt për ta bërë procesin e pranimit më të besueshëm, me një kontroll të fortë politik, më dinamik dhe të parashikueshëm. Mezi pres diskutimet me shtetet anëtare dhe mbajtjen sa më shpejt të konferencave të para ndërqeveritare me të dy vendet. E ardhmja e tyre qëndron qartë në Bashkimin Evropian dhe unë jam i bindur se ata do të vazhdojnë të zbatojnë reformat në rrugën e tyre të BE, siç kanë bërë deri më tani”, deklaroi Varheli.

Kornizat negociuese vendosin udhëzimet dhe parimet për negociatat e pranimit me secilin vend kandidat. Objektivi i negociatave është që Shqipëria dhe Maqedonia e Veriut të adoptojnë në tërësi legjislacionin europian dhe të sigurojnë zbatimin e plotë dhe zbatimin e saj pas pranimit.

Drafti i kuadrit negociues bazohet në përvojën e zgjerimeve të kaluara dhe negociatat e vazhdueshme të pranimit. Ato integrojnë metodologjinë e rishikuar të zgjerimit, marrin në konsideratë legjislacionin evropian në zhvillim dhe pasqyrojnë siç duhet meritat e veta të vendeve dhe situatat specifike.

Parashikueshmëria e procesit të anëtarësimit mund të përmirësohet nga më shumë qartësi mbi pasojat pozitive që mund të sjellin progresi në reforma, si dhe në pasojat e mundshme negative në rast të mungesës së përparimit, ngecjes së zgjatur ose prapambetjes në zbatimin e reformës dhe përmbushjes së kërkesave të procesi i pranimit.

Pasi Shtetet Anëtare të kenë miratuar kornizat e bisedimeve, Kryesia e radhës e Këshillit të Bashkimit Evropian do të paraqesë Pozicionin e Përgjithshëm të BE-së të dakordësuar në konferencën e parë ndërqeveritare me secilin vend, duke shënuar fillimin zyrtar të negociatave të pranimit. Kornizat e bisedimeve do të bëhen publike në këtë fazë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.