.png)
KPK, (Komisioni i Pavarur i Kualifikimit), ka vendosur që të shkarkojë nga detyra prokurorin e Tiranës, Genci Qana.
Një nga arsyet kryesore të shkarkimit, kanë qenë problemet me pasurinë, por ndaj Qanës, ka pasur edhe denoncime për dosjet që ka hetuar më parë, përfshirë pushimin e hetimeve për një aksident me vdekje në punë.
Më 9 mars, në seancën dëgjimore, prokurori Qana u përball në Komisionin e Pavarur të Kualifikimit me dyshime mbi burimin e ligjshëm për disa prej pasurive të tij.
Prokurori i Tiranës, rezultonte me një bilanc negativ me 1.4 milionë lekë për periudhën deri në vitin 2003 dhe me mbi 2 milionë lekë nga viti 2003, deri në vitin 2016.
Nga relatimi, rezultoi se KPK nuk kishte konsideruar të ligjshme, një hua 5 mijë euro dhe 730 mijë lekë të tërhequra nga llogaritë bankare për blerjen e një makine për 14 mijë euro në vitin 2012, duke krijuar një minus prej 1.7 milionë lekë në burime të ligjshme.
Qana, karrierën e ka të përqendruar në Tiranë, në fillim tek Krimet e rënda dhe më pas në Prokurorinë e Shkallës së Parë.
Në këtë prokurori, ai ka mbajtur edhe postin zv.drejtuesit dy herë dhe një herë postin e drejtuesit, pas shkarkimit të Dritan Rreshkës nga Vettingu.
Ai ka qenë numri dy i Prokurorisë së Tiranës në kohën që organi i akuzës drejtohej nga Ina Rama dhe ka marrë sërish të njëjtin post, në kohën kur Prokuroria e Përgjithshme drejtohej nga Arta Marku.
Vendimi i shkarkimit, u dha nga trupa e kryesuar nga Valbona Sanxhaktari, me anëtare Etleda Çiftja dhe relatore Xhensila Pinen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
