Shpërndarja e drogës në kryeqytet dhe përdorimi i saj pa as më të voglin dyshim që është kthyer në gangrenën më të madhe të krimit. Aq sa policisë nuk i duhet shumë mund për të zbuluar mbajtësit e hashashit. Mjafton që ata të shfaqen të shqetësuar, sapo shohin një patrullë dhe kjo mjafton që policia t’i vihet pas. Kështu ka vepruar policia edhe në rastin e shtetasit D. G, i moshës 25 vjeç nën masën e sigurimit “detyrim paraqitje”. Burimet e gazetës Si bëjnë me dije se i riu u largua me shpejtësi në zonën e Kinostudios sapo pa një patrullë policore.
Por në dokumentet e prokurorisë që më pas e dorëzoi Grudën si të pandehur shpjegohet se si ai mbante në dorë një qese me bukë. Kur policia e ka arritur të riun, fillimisht nuk ka gjetur asgjë të dyshimtë tek ai. Por në vazhdim në qesen e letrës ku gjendej buka, u vërejt edhe sasia e hashashit. Akuza vlerëson se bashkë me bukën aty ishin fshehur nga i riu edhe 20.6 gramë hashash.
Ai është përgjigjur menjëherë duke shpjeguar se nuk ishte shpërndarës, por e mbante drogën bashkë me bukën, pasi ishte përdorues. Prokuroria thekson se kjo sasi nuk mund të konsiderohet për përdorim vetjak, ndaj duke u bazuar në një sërë ekspertizash, e ka dorëzuar të pandehur në gjykatë për akuzën e prodhimit dhe shitjes së narkotikëve, vepër e parashikuar nga neni 283/1 i kodit penal.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.