Pas video-skandalit në Austri, Kurz thërret zgjedhjet e parakohshme

Kancelari austriak Sebastian Kurz ka bërë thirrrje për zgjedhje të parakohshme pas dorëheqjes së zëvendëskancelarit.

Heinz-Christian Strache, dha dorëheqjen të shtunën, pasi dy gazeta gjermane, “Der Spiegel” dhe “Sueddeutsche Zeitung”, publikuan pamje filmike ku ai shfaqej tek i ofronte kontrata shtetërore një investoreje të dyshuar ruse, gjatë një feste në Ibica të Spanjës.
Kancelari Kurz tha se nuk mundi të arrinte një marrëveshje me udhëheqësit e Partisë së Lirisë mbështetës të politikave kundër-emigracionit të zotit Strache, për të çuar përpara koalicionin me Partinë Popullore të qendrës së djathtë.
Ai tha gjithashtu se një koalicion i mundshëm me socialdemokratët nuk do ta lejonte qeverinë austriake të zbatonte politikat e saj për uljen e borxhit e të taksave.
Dorëheqja e Heinz-Christian Strache konsiderohet një goditje për forcat populiste e nacionaliste që janë pro politikave më të forta ndaj emigracionit në Europë.
Heinz-Christian Strache njoftoi dorëheqjen të shtunën dhe nuk pranoi pyetje nga gazetarët. E përditshmja gjermane "Sueddeutsche Zeitung" dhe e përjavshmja "Der Spiegel" publikuan të premten pjesë nga një video e fshehtë që tregonte zotin Strache tek i ofronte kontrata të qeverisë austriake një shtetaseje ruse që pretendonte se ishte e interesuar të investonte sasi të mëdha parash në Austri. Politikani 49-vjeçar tha se kishte qenë nën efektin e fortë të pijeve alkoolike dhe ishte ''sjellë si një adoleshent'' në një përpjekje siç tha ai, për "t'i bërë përshtypje organizatores tërheqëse'' të festës në një vilë në Ibica.
Edhe Kancelarja gjermane Angela Merkel ka folur, pasi kancelari austriak ka dhënë dorëheqjen dhe vendi shkoi në zgjedhje të parakohshme. Merkel u shpreh se skandali tregon se çfarë bëjnë realisht partitë e ekstremit të djathtë në Europë, kurse ajo shton se europianët duhet të mos votojnë të tilla parti politike.
“Na duhet të merremi me lëvizje populiste të cilat në shumë fusha janë përçmuese të këtyre vlerave, që dëshirojnë të shkatërrojnë Evropën e vlerave tona. Ne duhet të kundërshtojmë këtë në formë të prerë”, është shprehur Merkel.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.