Ambasadorja e Shteteve të Bashkuara të Amerikës i ka dhënë mbështetje Kolegjit të Posaçëm të Apelimit, organi fundor dhe vendimtar i procesit të vettingut, i goditur së fundmi nga akuzat e ngritura ndaj anëtarit të tij, Luan Daci për falsifikim dokumentacioni.
Kim vizitoi një ditë më parë këtë Kolegj, ku para se të hynte në takim përcolli mesazhin e drejtpërdrejtë drejtuar klasës politike shqiptare që t’u japë fund lojërave me reformën në drejtësi.
Këtë të shtunë, kryediplomatja amerikane në Tiranë hodhi në rrjetet sociale një foto nga takimi i zhvilluar, ku shfaqet me në krah ish-kryeprokuroren Ina Rama, aktualisht anëtare e Kolegjit të Posaçëm të Apelimit.
“Kolegji i Posaçëm i Apelimit ka një detyrë të vështirë, por procesi i vettingut duhet të vazhdojë që të tregojë llogaridhënie dhe të fitojë besimin e qytetarëve shqiptarë. SHBA mbështet reformën në drejtësi. Le të lëvizim përpara, hap pas hap, pavarësisht pengesave”, shkruan Kim.
Mesazhi i ambasadores amerikane mbërrin një ditë para seancës së parashikuar në KPA ndaj Luan Dacit. Seanca ishte planifikuar për ditën e premte, por ajo u shty me arsyetimin se gjyqtari Daci e kishte të pamundur pjesëmarrjen për shkaqe shëndetësore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.