.png)
Ministria e Bujqësisë dhe Zhvillimit Rural ka reaguar në lidhje me sigurinë e produkteve ushqimore që gjenden në treg.
“Sot në tregjet shqiptare ka produkte ushqimore të sigurta dhe të çertifikuara sipas standardeve të sigurisë ushqimore të garantuara me ligj dhe akte rregullatore”, thotë ajo.
Sipas Ministrisë së Bujqësisë, institucionet në varësi të saj, monitorojnë dhe raportojnë rregullisht lidhur me sigurinë e prodhimeve vendase. Ato kanë marrë masat përkatëse ndaj çdo rasti abuzimi që kanë zbuluar këto institucione ose që janë bërë publike në media, deri në pezullim të aktivitetit prodhues të subjekteve që kanë kryer shkelje të ligjeve dhe standardeve në fuqi.
Gjithashtu, citon ministria, prodhimet bujqësore shqiptare konkurrojnë sot në tregjet ndërkombëtare.
Ministria pohon se Shqipëria është një nga vendet kryesore të eksportit të prodhimeve bujqësore në rajon ndërsa janë rritur ndjeshëm eksportet drejt vendeve të BE-së.
Vetëm për vitin 2018, thotë ajo, vlera e produkteve bujqësore vendase të eksportuara në Itali është 8.5 miliard lekë, në Greqi 2.9 miliard lekë, Suedi 2.2 miliard dhe Gjermani 1.4 miliardë. Eksporti i domateve shqiptare është trefishuar në volum nga rreth 25 mijë ton në vitin 2013 në rreth 75 mijë ton në fund të 2018 dhe pesëfishuar në vlerë duke arritur në 4.4 miliardë lekë në 2018. Kjo rritje e eksporteve të prodhimeve vendase, sipas saj, dëshmon se fermerët shqiptarë ofrojnë produkte të cilësisë së të lartë dhe të sigurta.
“Deri më tani nuk ka pasur kthime mbrapsht të prodhimeve bujqësore nga Shqipëria për shkak të treguesve të sigurisë ushqimore që lidhen me nivelin e pranisë së pesticideve”, citon ministria.
Në lidhje me importet e produkteve bimore dhe shtazore, ajo pohon se mbi importin e mishit të gjedhit, derrit dhe shpendit nga Brazili, që në vitin 2017 ushtrohen kontrolle zyrtare të autoriteteve kompetente të sigurisë ushqimore në masën 100% të ngarkesave të ardhura.
Gjithashtu në Shqipëri ekzistojnë strukturat e përshtatshme për të bërë kontrollin e sigurisë së prodhimeve blegtorale e bujqësore. Instituti i Sigurisë Ushqimore dhe Veterinarisë (ISUV) me një përvojë mbi 90 vjecare, bën kontrollin e sigurisë ushqimore, të shëndetit të kafshëve dhe mbrojtjen e bimëve, ka rreth 33 laboratorë teknikë të disiplinave të ndryshme.
Vetëm vitet e fundit, thotë ministria, janë investuar mbi 3 milionë euro në pajisje laboratorike për sigurinë ushqimore me teknologji bashkëkohore europiane. Këta laboratorë përdorin metoda për kryerjen e analizave konform protokolleve ndërkombëtare dhe teknikave instrumentale të përdorura nga laboratorët e referencës në BE. Në vitin 2018, ISUV kreu mbi 60 000 analiza të lidhura me sigurinë e prodhimeve bujqësore dhe blegtorale. Për të mbuluar të gjithë gamën e analizave të nevojshme për garantimin e sigurisë ushqimore, ISUV sot bashkëpunon me laboratorë dhe institute shkencore prestigjioze të vendeve të BE në Belgjikë dhe Itali.
Në 5 vitet e fundit investimet në industrinë agropërpunuese, veçanërisht të qumështit, arrijnë vlerën prej rreth 673 milion lekë. Ato kanë sjellë rritjen e kapaciteteve të përpunimit me teknologji moderne që garanaton plotësisht standardet e sigurisë dhe cilësisë së produkteve dhe nënprodukteve të tij. Sot stabilimentet e përpunimit të qumështit janë të pajisura me certifikata ndërkombëtare të sigurisë HAÇP dhe ISO.
“Garantojmë qytetarët se siguria ushqimore mbetet prioritet i punës së Ministrisë së Bujqësisë dhe Zhvillimit Rural dhe programit të qeverisë në kuadër të sigurisë kombëtare. Nuk do të ketë tolerancë ndaj askujt që abuzon me ushqimet dhe jemi të vendosur për të zbatuar me rigorozitet ligjin në çdo rast që konstatohet se është cënuar siguria ushqimore. Autoriteti Kombëtar i Ushqimit ka nisur menjëherë verifikimet dhe kontrollet në terren për rastet e denoncuara në media. Minitria e Bujqësisë dhe Zhvillimit Rural dhe të gjitha institucionet e varësisë mbeten të vendosur për t’i shkuar deri në fund cdo rasti abuziv të konstatuar. Njëkohësisht inkurajon Prokurorinë të çojë përpara hetimet dhe të vendosë përpara ligjit këdo që cënon sigurinë ushqimore”, thotë Ministria.
Megjithatë në treg si qytetarët dhe studimet e ndryshme tregojnë për një rrezik të sigurisë ushqimore në tregjet shqiptare, si në tregun e kafshëve të gjalla, po ashtu edhe në prodhimet e importit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
