Presidenti Ilir Meta mohoi se është ai personi që po bën lojëra me reformën në drejtësi. Gishtin si autor të këtyre lojërave ai e drejtoi nga Kryeministri Edi Rama dhe pasi lexoi platformën me 14 pika për daljen nga kriza tha se do të kërkojë edhe një hetim ndërkombëtar nga Bashkimit Europian për zbatimin e kësaj reforme.
Meta nuk komentoi deklaratat e Ambasadores Amerikane që kërkoi vazhdimin përpara me reformën në drejtësi dhe të ndalen lojërat e përpjekjet për “ta vrarë atë”.
“Nuk komentoj deklaratat apo qëndrimet të ambasadores. Ambasadorja ka të drejtë kur thotë stop këtyre lojërave. Kam 4 vjet që them stop lojërave me reformën në drejtësi. Vetëm për Ilir Metën nuk mund ta kishte ambasadorja, që ka pas vlerësimet më të mira formalisht dhe zyrtarisht. e kam takuar shumë herë ambasadoren, më shumë se ç’jam takuar me ambasadorë amerikanë dhe europianë për 4 vite. Unë nuk kam ndërhyrë asnjëherë për zgjedhjet në SHBA, e mbani mend deklaratën e bërë kundër atij tjetrit?! S’merrem me këto lojëra. Unë them që kjo është platforma dhe këtë platformë ja kam dorëzuar ambasadores. Lojërat nuk pushuan për ta kapur atë reformë edhe me Kushtetutë dhe kryetari i Kuvendit, Ilir Meta i thirri hajde këtu se kështu nuk vazhdohet dhe ju e dini se kush nuk erdhi (Edi Rama). Burimi i konfliktit është identifikuar për të gjithë botën demokratike dhe për të gjithë ata që janë të shqetësuar se vendi po shkon drejt një humnere”, deklaroi ai.
Meta tha se ai luan hapur me të gjithë aktorët vendas dhe ndërkombëtarë dhe se maskat për reformën në drejtësi kanë rënë. Presidenti deklaroi se do t’i kërkojë BE hetim ndërkombëtar për reformën në drejtësi.
“Maskat e reformës kanë rënë prej kohësh, pavarësisht maskave që mbajmë për shkak të Covid-19. Do ta diskutojmë këtë çështje dh i kërkoj BE hetim për situatën me reformën në drejtësi, si ishte kushtetuta, si ishin ligjet e reformës dhe sesi janë zotuar. Meta është ballëlartë se çdo veprim të tij e ka të mirëdokumentuar”, u shpreh Presidenti.
Meta tha se fillimisht ka njohur partnerët ndërkombëtarë dhe aktorët politikë vendas që në muajin prill me përmbajtjen e platformës së tij. Ai thotë se Kryeministri Edi Rama i është përgjigjur duke propozuar mbledhjen e Këshillit të Sigurisë Kombëtare, që të trajtojë çështjen e integrimit. Kjo, tha Meta ishte e pamundur. Por, vetë Kryeministri Edi Rama e mohoi përmes një reagimi në rrjetet sociale se platforma presidenciale kishte mbërritur në zyrën e tij.
Në platformën e tij, Presidenti propozon ngritjen e një Këshilli Politik, që në pikën nëntë të propozimeve i jepet edhe ekskluziviteti për të miratuar çdo ndryshim dhe ndërhyrje të reformës në drejtësi. Meta sqaroi konceptin e tij për këtë këshill, që tha se nuk duhet të ngatërrohet më Këshillin Politik të ngritur për miratimin e reformës zgjedhore.
“Nuk kam parasysh thjesht Këshillin Politik të platformës zgjedhore, por ky është modeli me gjithëpërfshirje, mund t’i vëmë një emër tjetër. Gjithë çështjet që kërkojnë zgjidhje nga BE kërkojnë përfshirjen e opozitës reale. Prandaj janë vënë këto kushte, sepse kemi probleme me legjitimitetn e sistemit tonë demokratik”, tha Meta.
Presidenti i vlerëson plotësisht normale dhe propozimet e tij për të ndërhyrë në ligjet e reformës për plotësimin e Këshillit të Emërimeve në Drejtësi dhe i qëndron bindjes së tij se juridikisht mandati i Ardian Dvoranit duhet përfunduar. Ai thotë se Dvorani po qëndron në këtë post pa asnjë bazë ligjore e kushtetuetese.
“Kush e mban atë në krye të KED? E mban ligji?! E mban Kushtetuta?! Ka 7 vjet që i ka mbaruar mandati. U shuan të gjithë mandatet e Gjykatës së Lartë që të mbetej vetëm ky, sepse u duhej vetëm ky. Të hiqen të gjithë që të mbetej vetëm ky që të qëndronte në krye të KED”, deklaroi ai.
Meta përsëriti se do të vazhdojë të qëndrojë në krye të detyrës si President deri në përfundim të mandatit dhe të paktën për momentin hodhi poshtë mundësinë e formimit të një force të re politike.
“Presidenti Meta është këtu si President deri më 24 korrik 2022 dhe nuk ka nevojë as të mbështesë ndonjë parti, as të krijojë parti dhe asgjë tjetër. Por, dijeni se diktatura ka trokitur, mos e merrni me shaka”, u shpreh Presidenti.
Meta përsëriti gjithashtu qëndrimin se me aktin e shembjes së godinës së Teatrit Kombëtar nuk u shemben thjesht muret e asaj godine, por ra i totalisht shteti ligjor dhe Qeveria po vepron në paligjshmëri të plotë.
Drafti i plotë me propozimet e Metës
1- Mazhoranca dhe opozita (parlamentare dhe jo-parlamentare) duhet të përfundojnë me vendosmëri Reformën Zgjedhore, sipas rekomandimeve të OSBE/ODIHR dhe konkluzioneve të Këshillit Europian për Çështjet e Përgjithshme.
2- Këshilli i Emërimeve në Drejtësi duhet të vazhdojë funksionimin, duke përfshirë ndryshimin e akteve nënligjore të tij, në përputhje me rekomandimet e Komisionit të Venecias në draft-opinionin e 6 marsit. Për tre vendet e lira (2 nga Presidenti dhe 1 nga Parlamenti), KED duhet të paraqesë listat e kandidatëve për secilin institucion sipas sekuencës kushtetuese: Presidenti – Parlamenti – Presidenti
3- Këshilli i Emërimeve në Drejtësi duhet të pajtohet me pjesëmarrjen e Avokatit të Popullit në të gjithë veprimtarinë e tij dhe diskutimet, në përputhje me Kushtetutën dhe Ligjin.
4- Mandati i Kryetarit aktual të Këshillit të Emërimeve në Drejtësi përfundon me emërimin e tre gjykatësve të Gjykatës së Lartë. Kryetari aktual i KED humbet menjëherë të gjitha të drejtat për të vazhduar ushtrimin e mandatit të tij, me vonesë të gjatë, si anëtar i Gjykatës së Lartë, dhe për pasojë si Kryetar i KED.
5- Këshilli i emërimeve në drejtësi vazhdon të funksionojë sipas ligjit, kryesohet nga Nënkryetari.
6- Parlamenti Shqiptar merret menjëherë me çdo boshllëk ligjor, në mënyrë që Presidenti dhe Parlamenti të plotësojnë vendet e mbetura bosh në KED brenda 1 viti kalendarik.
7- Parlamenti Shqiptar tërhiqet nga çdo iniciativë ligjore që ndryshon formatin dhe procedurën e betimit në detyrë të anëtarëve të Gjykatës Kushtetuese dhe anëtarët e tjerë të lartë të sistemit gjyqësor.
8- Parlamenti Shqiptar tërhiqet nga “Paketa Anti-shpifje” dhe nga çdo nismë e ngjashme ligjore në të ardhmen.
9- Çdo ndryshim ligjor ose kushtetues që lidhet me reforma gjyqësore duhet të bëhet vetëm përmes konsensusit unanim të Këshillit Politik.
10- Në kuadrin e Këshillit Politik, partitë bien dakord brenda qershorit për të emëruar Shef-Negociator për anëtarësimin në BE, një ekspert të nivelit të lartë, integriteti, besueshmëria dhe profesionalizmi i të cilit është i pajtueshëm nga të gjitha palët.
11- Të gjithë gjyqtarët e Gjykatës së Lartë emërohen në përputhje me dispozitat kushtetuese dhe ligjore, dhe sa më shpejt të jetë e mundur.
12- Këshilli i Lartë Gjyqësor Këshilli i Lartë i Prokurorisë miraton menjëherë hartën e re gjyqësore për rishpërndarjen e burimeve njerëzore brenda sistemit të Gjykatës së Apelit dhe Gjykatat e Shkallës së Parë, dhe vazhdohet me plotësimin e vendeve bosh të krijuara nga dorëheqjet ose vettingu.
13- Këshilli i Lartë Gjyqësor duhet të përcaktojë parësore mbingarkesën e Gjykatës Administrative të Apelit, dhe të propozojë masat e nevojshme që lejon një proces të rregullt brenda afatit kohor (1 muaj) në këtë Gjykatë.
14- Parlamenti Shqiptar duhet të shqyrtojë pa interes politik, kandidatët e propozuar nga Presidenti i Republikës për Kryetarin e Kontrollit të Lartë të Shtetit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.