.png)
Nga Gazeta ‘Si’- Kryeministrja italiane Giorgia Meloni ka folur për marrëdhënien e saj me presidentin amerikan Donald Trump në një intervistë për The New York Times, duke pranuar se bashkëpunimi mes tyre nuk ka rezultuar aq i lehtë sa kishte parashikuar.
“Është e qartë se, me Donald Trumpin, mendoja se gjërat do të ishin më të lehta, duke pasur parasysh përputhjen tonë për emigracionin dhe kulturën ‘woke’. Por gjërat dolën ndryshe”, tha Meloni.
Në korrik, Trump për Melonin: “Ka nevojë për një urdhër ndalimi”
Tensionet mes dy qeverive arritën kulmin korrikun e kaluar, përpara samitit të NATO-s në Ankara të Turqisë. Trump publikoi në rrjetin e tij social Truth një foto ku shfaqej krah Melonit, të shoqëruar me mbishkrimin: “Ka nevojë për një urdhër ndalimi” – një referencë ndaj masave që përdoren zakonisht ndaj personave që ndjekin ose shqetësojnë dikë, duke sinjalizuar dëshirën për të mbajtur një distancë më të madhe nga kryeministrja italiane.
Në intervistë, Meloni tha se nuk kishte pasur kontakte me Trumpin prej disa javësh. E pyetur nëse ishte planifikuar një takim pas pushimeve verore, liderja e Vëllezërve të Italisë u përgjigj shkurt: “Do ta shohim.”
Megjithatë, ajo theksoi se vazhdon ta konsiderojë shumë të rëndësishme unitetin e Perëndimit dhe nënvizoi se nuk e përcakton strategjinë e Italisë mbi bazën e marrëdhënieve të saj personale.
Në një plan më të gjerë, Meloni përsëriti qëndrimin e saj se nuk i pëlqen ideja e një “Italie të nënshtruar, që e sheh veten si inferiore ndaj të tjerëve”. Sipas saj, synimi është të realizojë “revolucionin më të madh të mundshëm në këtë vend: një revolucion të krenarisë.”
“Dua të bëj revolucionin e krenarisë në Itali”
Kryeministrja foli gjithashtu për vendimin e saj për të përdorur termin “presidente” në gjininë mashkullore, duke konfirmuar kundërshtimin ndaj fushatave feministe për gjuhë gjithëpërfshirëse.
“Për mua, ajo që ka rëndësi është nëse jam e lirë të bëhem kryetare e Këshillit të Ministrave. Kjo është barazi, jo të më quajnë ‘la presidente’”, tha ajo.
Meloni iu rikthye edhe fjalimit të saj të famshëm në një tubim politik, ku deklaroi: “Jam grua, jam nënë, jam italiane, jam e krishterë.” Ajo i tha The New York Times se beson se këto fjalë prekën një ndjenjë të përbashkët te miliona njerëz – ndjesinë se identiteti i tyre më autentik dhe themelor është nën kërcënim.
Artikulli i gazetës amerikane trajton gjithashtu origjinën e Melonit në lagjen Garbatella të Romës, marrëdhëniet e saj familjare dhe rrugëtimin politik, i cili nisi në Frontin Rinor, organizatë e lidhur me atë që në atë kohë ishte Lëvizja Sociale Italiane, një parti me frymëzim neofashist.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje