Gazeta Si - Me kokën të ulur dhe të penduar në dukje, dy prej katër të akuzuarve për përdhunimin e një 26-vjeçareje në Vlorë, kanë dalë këtë të mërkurë para gjykatës për vlerësimin e masës së sigurisë.
Për Oltjon Tahirin dhe Albi Ceno, Gjykata e Vlorës saktoi masën e sigurisë "arrest në burg", për nxitje dhe përdorim të drogës dhe më pas përdhunimin e të resë pak ditë më parë.
Ngjarja ndodhi pak ditë më parë, ku Albi Ceno dhe Oltjan Tahiri, tashmë të arrestuar, së bashku me Gentjano Mehmeti dhe shtetasi V.K., të dy të shpallur në kërkim, detyruan të renë të konsumonte drogë dhe më pas e përdhunuan.
Sipas burimeve, 26-vjeçarja u gjet pa ndjenja nga policia në hyrje të hotelit. Fillimisht policia në një njoftim zyrtar bëri me dije se ishin tre persona që kishin marrë pjesë në ngjarjen e rëndë, ndërsa ditën e djeshme në një reagim të dytë, njoftoi për një person të katërt, i cili është shpallur në kërkim.
Prokurori ka kërkuar ndaj tyre masën e arrestit me burg. Për këtë ngjarje gazetarja Afrovita Hysaj është kërcënuar nga shtetasi Albert Deliaj, pasi një prej te akuzuarve dyshohet se ka lidhje me 57-vjeçarin.
“Je në gjak me mua”, ishte mesazhi që Deliaj i dërgoi gazetares, e cila tashmë çështjen e ka lënë në dorë te drejtësisë. Një ditë më parë policia njoftoi se ndaj tij ka nisur një procedim në gjendje të lirë.
Deliaj është pronar i një televizioni lokal në Vlorë, ku në një postim në rrjete sociale, në faqen e këtij televizioni, u përdorën terma fyese dhe denigruese për gazetaren. Pas një ndërgjegjësimi në masë, postimi u fshi.
Sipas burimeve paraprake, të akuzuarit kanë qenë duke festuar së bashku në ambientet e një hoteli.
Më pas, vajza dhe tre miqtë e saj kanë shkuar në katin e dytë të hotelit ku kanë kryer marrëdhënie. Mësohet se vajza ka pasur probleme shëndetësore, duke pësuar gjendje të fikëti.
Tre djemtë e kanë marrë në krahë dhe e kanë nxjerrë në rrugë, duke e braktisur trupin dhe larguar. Ka qenë njëri nga punonjësit e hotelit që ka njoftuar policinë, e cila më pas ka transportuar vajzën në spitalin rajonal të Vlorës.
Aty e dëmtuara ka dhënë dëshminë e saj, duke rrëfyer se është detyruar të përdorë lëndë narkotike dhe më pas është përdhunuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.