Teatri Kombëtar i Kukullave dhe mozaiku i Muzeut Historik Kombëtar do të restaurohen.
Lajmi është bërë me dije nga ministrja e Kulturës, Elva Margariti.
Ministrja Margariti së bashku me ambasadorin e BE në Tiranë, Luigi Soreca, ishin në Teatrin e Kukullave dhe pranë mozaikut të Muzeut Historik Kombëtar.
Në një postim të saj në “Facebook”, ministrja Elva Margariti shkruan se restaurimi po kryhet falë mbështetjes së BE. “Një ditë e rëndësishme për trashëgiminë tonë kulturore. Falë mbështetjes së Bashkimit Europian nis rrugëtimin programi më i madh i restaurimit dhe rijetëzimit ‘EU4CULTURE’, që shtrihet në gjithë territorin e prekur nga tërmeti i 26 nëntorit 2019. E nisim këtë program me dy ndërtesa simbolike: Teatrin Kombëtar të Kukullave, ish-godinën e parlamentit të parë shqiptar dhe mozaikun e fasadës së Muzeut Historik Kombëtar”, shprehet ministrja Margariti, që ka postuar dhe foto nga këto dy godina.
Ministrja Margariti vijon më tej se është bërë prezantimi i dy projekteve, për t’i hapur udhën dhe të tjerëve në vijim.
“Bashkë me ambasadorin e BE, Luigi Soreca dhe përfaqësuesen e UNOPS, Pamela Lama prezantuam këto dy projekte që nisin nga puna, për t’u hapur udhën projekteve të tjera, siç është ambicia jonë për rikonceptimin e Muzeut Historik Kombëtar dhe rijetëzimin sipas standardeve të kohës”, shprehet ministrja Elva Margariti.
Gjatë tërmetit të nëntorit të 2019, godina e Teatrit të Kukullave, pësoi dëmtime të konsiderueshme dhe shumë shpejt pasi u evidentuan edhe dëmet, u mor vendimi për të ndërhyrë për restaurimin e saj.
Godina e Teatrit të Kukullave në fillim u ndërtua nga austriakët dhe më pas në vitin 1925 dhe pjesa e mbetur u përfundua prej shtetit shqiptar.
Gjatë viteve 1925-1944 ka shërbyer si selia e legjislativit shqiptar dhe më pas kjo ndërtesë shërbeu si selia e Këshillit Antifashist Nacionalçlirimtar. Pas përfundimit të luftës ky objekt shërbeu edhe si Shtëpia e Pionierëve dhe më pas përfundimisht në të u vendos Teatri i Kukullave sikurse shërben edhe në ditët e sotme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.