.png)
“E di që ndoshta do mërzis shumë vegjetarianë”... Kështu e nis bisedën për recetën që do të tregojë për Gazetasi.al Dhurata Thanasi, historiane e kulinarisë Shqiptare, një ‘avokate’ e ushqimeve tradicionale që shpeshherë zgjedh të bëjë shtesa produktesh që janë histori e një vendi tjetër por kombinojnë perfekt me recetën.
Thanasi tregon se ka zgjedhur një recetë që përkon më së miri edhe me stinën e fillimdimrit dhe me dashurinë e shqiptarëve për mishin, “duke marrë parasysh dhe promovuar ngrënien e mishit në mënyrë të ekuilibruar”.
“Lepuri çomlek është një pjatë e lashtë shqiptare”, thotë Thanasi dhe me këtë pajtohen të gjithë ato që kanë ngrënë nga dora e gjysheve të tyre. Një pjatë që ndoshta kujton ditët e zymta të Shqipërisë por tavolinën e ngrohtë nga kjo pjatë. Çomlekun mund ta përgatisësh me çdo lloj mishi por kurrë nuk do të shijojë aq sa shijon me mishin e lepurit, aq më mirë kur ai është i freskët.
Mund të quhet një gatim i ‘shpikur’ nga gjahtarët, të cilët njihen për mënyrat speciale dhe të veçanta të gatimeve ‘të egra’, kryesisht sepse dikur nuk kishin mundësi tjetër.
Çomleku me lepur është një pjatë magjepsëse dhe e plotë por që kërkon pikërisht durimin e një gjahtari për të filluar gatimin pasi procesi i përgatitjes së lepurit pasi është kapur është pak i gjatë.
Pasi pastrohet mirë lepuri, pritet në pjesë, lihet për disa orë në ujë dhe më pas marinohet për 12 orë.
Kjo bëhet për t’i dhënë mishit të lepurit një shije të plotë që më pas do të kombinohetme përbërësit e tjerë.
Thanasi e ka ndërthurur recetën tradicionale shqiptare me një recetë të lashtë të zonës së Piemontes, nga vjen vjehrra e saj: atë të lepurit me mollë të egra, ftonj dhe qepë të sheshta.
“Është shumë e lashtë dhe në familjen e saj e gatuanin me fundit e verës Barolo në zonën e Lange-ve”, thotë Thanasi e cila shton se ky kombinim është perfekt për të gjithë shijuesit e mishit të lepurit të cilin ajo e quan një mish të bardhë dhe elegant.
Edhe pse një ndërthurje Shqipëri-Itali, përbërësit janë të gjithë shqiptarë dhe “me shije që të bie në çaçkë të kokës" sepse në fund të fundit është një recetë tradicionale shqiptare me pak “recetë tradicionale” nga Italia.
Receta:
1 lepur gati 1 kg
5/6 kokrra mollë të vogla të egra ose 2 të më (të gjelbërta)
7-8 qepë të vogla të shtypura në anë
1 kokërr ftua
1 degë selino
1 degë rozmarinë
1 degë nenezhik të freskët
15-16 kokrra dellinjë e zezë (juniper)
1 degë trumzë të freskët ose thatë
3-4 karafila
4-5 thelpinj hudhra
200 ml verë kallmet ose çdolloj verë e kuqe fortë
1 kokërr limon
pak spec djegës
2-3 gjethe dafinë
10 gr stika pishe
100 ml vaj ulliri
30 gr gjalpë
100 gr sallo të tymosur ose pancetta
Kripë
Përgatitja:
Presim lepurin në copa (thela)
Me ndihmën e një thike presim shumë imët rozmarinën, dafinën, trumzën, nenexhikun, specin djegës
Mbulojmë (fërkojmë) copat e lepurit me këtë përzierje.
Mbulojmë copat e lepurit me një kapak dhe i vendosim për 2-3 orë në frigorifer
Në një tigan me bazë të gjerë shtojmë gjysmën e masës me vaj ulliri dhe gjalpin, dhe kaurdisim qepët. Më pas shtojmë, fetat e ftonjve dhe mollët e egra. I kriposim dhe e mbulojmë tiganin me kapak.
Pasi lëngu është shterur, e shuajmë me pak lëng mishi (1 litër të përgatitur më parë). E mbulojmë me kapak dhe e gatuajmë në zjarr të avashtë derisa ftonjtë të jenë zbutur.
Ndërkohë në një tigan tjetër shtojmë sallon dhe e lemë të karamelizohet derisa ti shkrijë gjithë yndyra.
Sistemojmë copat e lepurit, dhe hedhim gjithë marinimin e tyre në tigan.
Shtojmë karafilat, dëllinjën dhe nisim kaurdisjen. Në momentin që mishi është skuqur, e shuajmë me verë dhe e mbulojmë me kapak
Shtojmë limonin në feta dhe më pas e rregullojmë me kripë. marrim një tavë dhe në të shtojmë mishin e lepurit me lëngun e vet.
Më pas shtojmë harxhën e qepëve me mollë dhe ftonj.
Shtojmë stika pishe, e spërkasim me vajin e ullirit të mbetur dhe e fusim në furrë të mbuluar me letër kuzhine në temperaturë 200 grade Celsius për gati 45 minuta dhe e shërbejmë të ngrohtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
