Futboll

Kukësi dhe Teuta ndahen në barazim para syve të Panuçit

Është mbyllur në barazim sfida e fundit e vlefshme për javën e 13-të të Superligës Shqiptare, mes Kukësit dhe Teutës. Ndeshja e zhvilluar në “Selman Stërmasi” ka konfirmuar edhe një herë tjetër krizën te skuadra e Kukësit, që tashmë ka bërë 3 ndeshje pa fitore. Ndërsa Teuta me këtë barazim tregon se do të jetë një kockë e fortë këtë kampionat dhe një rivale deri në fund për Kupat e Europës. Sfida është ndjekur dhe nga një spektator i veçantë, trajneri i kombëtares, Kristian Panuçi.

Në minutat e para, ekipet provojnë që të gjejnë golin dhe të dyja i shkojnë afër, por pa mundur dot të konkretizojnë siç duhet. Me kalimin e minutave Kukësi merr në kontroll ndeshjen, duke u shfaqur më dominues. Por Teuta edhe një herë tregon se është një “nëndetëse” e vërtetë, pasi në momentin më të mirë të verilindorëve gjen goli. Për ekipin e Bledi Shkëmbit shënon Kamara, që përfiton nga një hutim në mbrojtjen e skuadrës. Pas këtij goli, Kukësi kërkon të reagojë menjëherë, por pa sukses, pasi goli i Rexhinaldos do të anulohej për pozicion jashtë loje.

Me rifillimin e pjesës së dytë, Kukësi hidhet i gjithi në kërkim të golit të barazimit. Nuk do të vononte shumë dhe Rexhinaldo gjen rrugën e rrjetës në minutën e 49’. Pas një goditje dënimi, sulmuesi nga Mozambiku hidhet në zonë dhe çon topin në rrjetën e portierit Isli Hidi. Pas barazimit, ekipi i Armando Cungut vihet në kërkim të golit të dytë. Por Rexhinaldo dhe Ethemi janë të pasaktë para portës.

Deri në fund rezultati mbeti i pandryshuar dhe ekipet do duhej të kënaqeshin me nga një barazim. Pas këtij barazimi Kukësi dhe Teuta nuk ndryshojnë pozicionet e tyre në tabelë, me verilindorët në vendin e pestë, ndërsa bregdetarët në vendin e tretë.


Copyright © Gazeta “Si”



Më Shumë