.png)
Gazeta Si - Kryebashkiaku i Kuçovës, Kreshnik Hajdari është marrë i pandehur nga SPAK, i cili i ka komunikuar këtë të mërkurë akuzën për "falsifikim të formularit të dekriminalizimit".
Një ditë më parë, Hajdari i shpëtoi heqjes së mandatit në Komisionin Qendror të Zgjedhjeve, ndërsa sot pozita e tij është vështirësuar me komunikimin e akuzës nga prokurorët e posaçëm. Ankimimi u bë nga koalicioni “Bashkë Fitojmë”.
Një ditë pasi fitoi betejën me Prokurorinë e Përgjithshme në Komisionin Qendror të Zgjedhjeve, i cili vendosi që të vijonte detyrën e tij si kryebashkiak i Kuçovës, pavarësisht dënimit të padeklaruar në Greqi, Kreshnik Hajdari është paraqitur mëngjesin e kësaj të mërkure në SPAK.
Seanca e marrjes në pyetje ka zgjatur deri në orën 11:30, ndërsa avokati i tij Theodhori Sollaku bëri të qartë se klienti i tij është pyetur mbi një kallëzim, "por nuk është marrë i pandehur".
Verifikimet nisën pas komfirmimit se Hajdari nuk kishte deklaruar një dënim në shtetin grek sipas ligjit për dekriminalizimin, ku Sollaku u shpreh se nuk e deklaroi, "pasi nuk kishte vlerë".
Kryetari i Bashkisë së Kuçovës rezulton se nuk ka deklaruar në formularin e dekriminalizimit një dënim ndaj tij me 4 muaj burg në vitin 1999 kur ka qenë minoren nga Gjykata e Janinës në Greqi për kalim të paligjshëm të kufirit.
Një ditë më parë, Komisioni Qëndror i Zgjedhjeve nuk ia hoqi mandatin duke argumentuar se vepra penale nuk hyn në atë kategori që e pengon të zgjidhet si funksionar.
Por sipas ligjit të dekriminalizimit, çfarëdo vepër penale duhet të deklarohet në formularin e vetëdeklarimit për funksionarët.
Gjykata në Janinë, e ka gjetur fajtor Hajdarin për hyrje në territorin grek në mënyrë të paligjshme dhe e ka dënuar në 23 qershor të vitit 1999 me “masë riedukuese të qortimit”, pasi në atë vit, kryebashkiaku i zgjedhur ka qenë vetëm 17 vjeç.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
