Nga Gazeta 'Si'-Edhe në ditën e dytë të aplikimeve për Skemën Kombëtare ka vijuar fluksi nga fermerët.
“Sipas statistikave zyrtare deri tani ka shkuar në 22 mijë numri i fermerëve që kanë aplikuar për të përfituar nga Skema Kombëtare e mbështetjes në Bujqësi 2023”, tha ministrja e bujqësisë, Frida Krifca.
Krifca shtoi se kjo shifër është rreth 40% e numrit total të aplikimeve të regjistruara në vitin 2022 që ishin 49 mijë.
Nga shifrat zyrtare të publikuara nga Ministria e Bujqësisë dhe Zhvillimit Rural rezulton se Korça është qarku që regjistron numrin më të lartë të aplikimeve me 3512 aplikime, ndjekur nga Fieri dhe Vlora me 3 343 dhe 2 187 fermerë aplikantë.
Kërkesat më të shumta, janë për të përfituar nga skema e naftës pa akcizë. Statistikat tregojnë se vetëm në ditën e parë për këtë skemë kanë aplikuar 7 676 fermerë nga 12 qarqet e vendit.
Mbështetja me naftë për fermerët këtë vit, ndryshe nga viti i shkuar, do të përfitohet vetëm për mbjelljet e sezonit të parë.
Aplikimet e ditës së parë janë kryer për një sasi nafte prej 1 679 813 litra naftë. Aplikimi zgjat deri në 11 prill.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.