.png)
Njësia 10 në Tiranë është bërë sot e para në historinë e Shqipërisë që voton në mënyrë elektronike, duke lejuar autoritetet të vendosën më pas nëse kjo strategji është e përshtatshme për t’u shtrirë më pas në të gjithë vendin.
Nënkryetarja e KQZ, Lealba Pelinku e cilësoi procesin e votimit elektronik të suksesshëm duke theksuar se në zgjedhjet e ardhshme do të zbatohet në të gjithë vendin.
“Infrastruktura ligjore është e shtruar. Është gjithë koha e nevojshme për ta organizuar. Kur KQZ ja doli në tre muaj, jam e bindur se në zgjedhjet e ardhshme votimi elektronik do të jetë një sukses 100%”, tha nënkomisionerja.
Më tje, ajo foli për tërheqjen në momentet e fundit të disa operatorëve elektronikë, duke thënë se ndonëse nuk ka prova, nga informacionet e marra, ata janë tërhequr nga presioni.
“Disa zona nuk u mbuluan dot me operatorë, përkatësisht zona të thella. Duke pasur parasysh që ishte një projekt, që si asnjëherë u implementua, në një hark kohor tejet të shkurtër, faza e rekrutimit të trajnerëve e ka ndjerë vështirësinë e kohës, ndaj e patëm të pamundur të arrinim t’i mbulonim të gjitha qendrat. Por, është një shifër vërtet e kënaqshme. Ka pasur raste, kur operatorët janë tërhequr, por janë tërhequr në kohë dhe kemi pasur kohë t’i zëvendësojmë. Problem ishte për 2-3 raste, kur u tërhoqën në momentet e fundit dhe KQZ e pati të pamundur t’i zëvendësojë. Kemi informacione, të pakonfirmuara me prova, që janë tërhequr për shkak të presionit, që iu është bërë. Por ngelet një numër shumë i ulët i operatorëve, që janë tërhequr në momentet e fundit”, u shpreh ajo.
E pyetur nga gazetari, nëse ka pasur raste, kur qytetarët janë paraqitur për të votuar dy herë, Pelinku theksoi se “Po, ka pasur situata kur dikush paraqitej dhe rezultonte se ishte identifikuar më parë. Pajisja në këtë pjesë nuk gabon dhe kjo ka shumë mundësi që lidhet me fenomenin, kur dikush tjetër të ketë përdorur mjetin e identitetit të personit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
