.png)
Qeveria e Kosovës ka vendosur që nga kjo e hënë, 20 shtator, të vendoset reciprocitetit ndaj Serbisë sa i përket targave të automjeteve.
Lajmi është bërë me dije nga ministri i Brendshëm, Xhelal Svelça, i cili shpjegon se nga sot të gjitha automjetet serbe që hyjnë në territorin e Kosovës të pajisen me targa të përkohshme.
Kështu, sot në orët e mëngjesit janë shtuar forcat policore në pikat kufitare me Serbinë për të mbikëqyrur zbatimin e këtij vendimi. Në vendim thuhet se vlefshmëria e këtyre targave të përkohshme është 60 ditë.
Kjo lëvizje ka shkaktuar reagimin e qytetarëve serbë, të cilët kanë dalë në protestë duke bllokuar rrugën. Një nga pjesëtarët e policisë u është drejtuar atyre në gjuhën shqipe duke iu thënë se protesta nuk u ndalohet, por rrugën duhet ta lirojnë.
Në hapësirën ajrore përmbi pikën kufitare ndërmjet Kosovës dhe Serbisë në Jarinje është parë edhe një helikopter i cili duket se po patrullon në atë zonë ku disa serbë kanë lënë automjetet e tyre në rrugë duke protestuar. Me ta është bashkuar edhe ministri për Komunitete dhe Kthim në Qeverinë e Kosovës, Goran Rakic.
Kryeministri i vendit, Albin Kurti ka thënë para deputetëve se vendosja e targave të Republikës së Kosovës për të gjitha automjetet me tabela të Serbisë ka qenë “imponim nga pala tjetër, e jo dëshirë e jona”.
“Targat nuk janë dëshirë e jona por imponim nga pala tjetër”, u shpreh Kurti gjatë seancës së Kuvendit.
Kurti tha se 15 shtatori i vitit 2021 ishte afati i fundit kur duhej të përmbyllej marrëveshja e arritur në Bruskel dhe duhej të vendoseshin targate Kosovës. “Pesë ditë pas skadimit të afatit qeveria mori sot masa për ndalimin e targave të pavlefshme”, ka thënë ai në seancën e Kuvendit të Kosovës.
Ai tha se sot nuk po ndodh asgjë e jashtëligjshme dhe diskriminuese por po ndodh gjithcka në përputhje me marrëveshjen.
Kurti i ka bërë thirrje qytetarëve serbë që ta marrin këtë si normalitet dhe se ky është trajtim i barabartë. Vendimi sipas tij nuk ka për qëllim destabilizimin e situatës. Kryeministri tha se të gjitha targat do të zëvendësohen, duke sqaruar se veprimet nuk janë kundër serbëve të veriut.
Ndërkohë, ministri për Komunitete dhe Kthim i Qeverisë së Kosovës, Goran Rakiç ishte sot i pranishëm në veri, ku serbët kanë lënë automjetet në rrugë duke protestuar në pikën kufitare të Jarinjës. Prej andej, ai është shprehur se është në kontakt me Beogradin zyrtar, raporton Gazeta Express.
Rakiç, i rrethuar nga protestuesit serbë ka thënë se është reaksion dhe jo aksion vendimi i sotëm i qeverisë së Kosovës për të mos e lejuar asnjë automjet që niset nga Serbia drejt Kosovës të kalojë në pikat kufitare pa u pajisur me targat e përkohshme të Republikës së Kosovës.
“Bisedimet nuk janë tavolinë suedeze të marrësh atë çka të pëlqen. Ky nuk është aksion. Ky është reaksion. Populli është i frikësuar”, tha Rakiç.
Ai deklaroi se ka tentuar të kontaktojë me ndërmjetësuesin e Bashkimit Evropian në dialog, Miroslav Lajçak. “Kam tentuar të flas me Lajçakun, por s’kemi marrë përgjigje. Jemi në kontakt me Beogradin”, tha Rakiç.
Kosova kishte paralajmëruar e vendosjen e masës së reciprocitetit për targat, gjatë raundit të fundit të dialogut me Serbinë, të ndërmjetësuar nga Bashkimi Evropian.
Zëvendëskryeministri Besnik Bislimi kishte thënë se marrëveshja për targat po skadon dhe se Kosova nuk do ta respektojë në menyrë të njëashme.
Deri më tani, veturat e Kosovës që kanë kaluar nëpër Serbi, është dashur t’i heqin targat e tyre ‘RKS’ (Republika e Kosovës) dhe të vendosin targa të përkohshme prej letre.
Çështja e targave ishte e rregulluar Marrëveshjen e Brukselit për lëvizjen e lirë, në kuadër të dialogut ndërmjet Kosovës dhe Serbisë, ku ishte përcaktuar që të gjithë pronarët e veturave që banojnë në Kosovë, duhet të përdorin targat 'KS' (Kosovë) ose 'RKS' (Republika e Kosovës) dhe kështu t’i hiqnin nga përdorimi targat që për serbët e Kosovës i lëshonte Ministria e Punëve të Brendshme e Serbisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
