Pas lëvizjes të qeverisë së Kosovës për të vendosur reciprocitetit ndaj Serbisë sa i përket targave të automjeteve, presidenti Aleksandër Vuçiç ka thirrur një mbledhje urgjente të Këshillit të Sigurisë Kombëtare të Serbisë.
Sipas, “Novostit”, temë kryesore e mbledhjes do të jenë ngjarjet në Kosovë. Mëngjesin e sotëm, Njësitë e Specializuara të Policisë së Kosovës janë pozicionuar në pikën kufitare Kosovë – Serbi, në Jarinje.
Reciprociteti ka shkaktuar reagimin e qytetarëve serbë, të cilët kanë dalë në protestë duke bllokuar rrugën
Dhjetëra autoblinda të Policisë së Kosovës janë pozicionuar atje për ta siguruar zbatimin e vendimit më të fundit të Qeverisë së Kosovës.
Sipas informacioneve të fundit, aktualisht ka rreth 300 automjete serbe në Jarinje dhe më shumë se 100 në Brnjak. "Të dy korsitë e trafikut janë të bllokuara dhe trafiku është i bllokuar," thotë Lista Serbe në një reagim, duke shtuar se konsultimet urgjente të anëtarëve të Listës Serbe u mbajtën këtë mëngjes.
Drejtuesit e Listës Serbe u shfaqën në mëngjes në Jarinje për t'u dhënë mbështetje serbëve, të cilët nuk pranonin vendimin.
Kryetari i Listës Serbe i bëri thirrje Presidentit të Serbisë, Aleksander Vuçic të ndihmojë serbët dhe të reagojë kundër këtij vendimi.
"Unë i bëj thirrje të gjithë atyre që janë ndaluar të përmbahen, dhe gjithashtu Prishtinës të mos ngrejë tensione. Ky është një kërcënim i drejtpërdrejtë për njerëzit, të cilët janë të shqetësuar se si të sigurojnë bukë për fëmijët e tyre. Ne gjithashtu informuam të Dërguarin Special Miroslav Lajçak dhe kërkuam ndihmën e BE. Dhe unë i bëj thirrje Presidentit Vuçiç, të reagojë, "tha Goran Rakic.
Asnjë veturë që niset nga Serbia drejt Kosovës, nuk mund të kalojë në pikat kufitare, pa u pajisur me targat e përkohshme të Republikës së Kosovës.
Vendimi për këtë është nënshkruar sot, nga ministri i Punëve të Brendshme të Kosovës, Xhelal Sveçla.
Ndërkaq tashmë kanë nisur të hyjnë veturat e para nga Serbia në Kosovës, të cilave nëpër pikat kufitare po iu vendosen tabelat e përkohshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.