Këshilli i Lartë Gjyqësor deklaron se pas verifikimeve, ka vendosur kualifikimin për emërim të shtatëmbëdhjetë kandidatëve për magjistratë, të cilët kanë përfunduar Shkollën e Magjistraturës në vitin akademik 2019-2020.
Me anë të një njoftimi për mediat, KLGJ thekson se me këtë vendimmarrje, Këshilli hap rrugën për caktimin e vendeve vakante në gjykatat e rretheve të vendit si dhe emërimin e shpejtë të tyre, me qëllim evadimin e çështjeve gjyqësore si dhe shërbimin në kohë, me cilësi dhe profesionalizëm ndaj qytetarëve.
“Në vijim të shqyrtimit të kandidaturave për ngritjen në detyrë në Gjykatën e Lartë, Këshilli vendosi kualifikimin e magjistratëve znj.Klodiana Veizi dhe z.Enton Dhimitri, si dhe vijimin e procedurave të mëtejshme të emërimit.
Gjithashtu pas shqyrtimit të kushteve dhe kritereve ligjore për ngritjen në detyrë në Gjykatën e Posaçme të Apelit për Korrupsionin dhe Krimin e Organizuar, Këshilli vendosi kualifikimin e magjistrates znj.Daniela Shirka si dhe vijimin e procedurave të mëtejshme të emërimit”, thuhet në njoftimin e KLGJ-së.
Në përfundim Këshilli diskutoi mbi verifikimin e kushteve dhe kritereve ligjore për emërimin si gjyqtar në Gjykatën e Lartë të kandidatit të katërt nga radhët e juristëve të spikatur, shqyrtimi i te cilit u shty për një mbledhje tjetër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.