Besnikëria e disa lojtarëve ndaj fanellës së ekipit që i ka rritur, i bën ata legjenda për tifozët, edhe pse në fushë mund të mos kenë qenë “yje”. I tillë është për Juventusin mesfushori Klaudio Markizio, i njohur me nofkën “Princi”. Ka ardhur tashmë zyrtarisht lajmi që pritej, lamtumira e Markizios nga Juventusi pas plot 25 vitesh.
Mesfushori bardhezi ka ndërprerë zyrtarisht dhe në mënyrë konsensuale kontratën me Juventusin. Një lajm që i ka pezmatuar tifozët e Juves. Ende nuk dihet ku do të luajë, sepse për të ka pasur interes nga disa skuadra, mes tyre edhe nga Monako. Numrat e tij thonë shumë: 25 vjet histori me fanellën e “Zonjës”, 389 ndeshje zyrtare, 37 gola, 7 tituj kampion, 4 Kupa të Italisë dhe 3 Superkupa të Italisë. Një lojtar flamur.
Letra e lamtumirës
"Një mijë mendime më kanë shoqëruar gjatë gjithë natës. Nuk ngopem së pari këto foto me fanellën bardhezi dhe këto vija, mbi të cilat kam shkruar jetën time si njeri dhe si futbollist. E dua këtë fanellë deri në pikën ku, pavarësisht gjithçkaje, jam i bindur se vjen e para ajo që është në të mirë të skuadrës. Gjithmonë”. Me këto fjalë Klaudio Markizio përshëndet pas 25 vitesh tifozët e Juventusit. Në postimin e tij në Instagram është edhe një foto e fëmijërisë, ku ai shfaqet me fanellën bardhezi. "Në një ditë të vështirë si kjo, dua t’ju them se jeni pjesa më e bukur e kësaj historie të jashtëzakonshme. Për këtë arsye, pas pak ditësh do të përshëndetemi në një mënyrë speciale”, - ka shkruar mesfushori pas vendimit për prishjen e kontratës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.