.png)
Ai është mbrojtësi më i mirë i Lacios së këtij sezoni, por që fati e deshi që në ndeshjen e fundit ta vendosë përballë skuadrës, fanelën e së cilës do të mbrojë sezonin e ardhshëm.
Stefan De Vrij është shndërruar në një kazus në shtëpinë e Lacios. Mbrojtësi holandez ka nënshkruar me Interin, me të cilin Lacio përballet në javën e fundit të Serisë A dhe nëse Sasuolo nuk bën ndonjë surprizë ndaj “Zikaltërve”, kjo ndeshje do të jetë vendimtare për një vend në Ligën e Kampionëve sezonin e ardhshëm.
Pra, nuk bëhet fjalë për një ndeshje dosido, por për ndeshjen e sezonit për të dyja ekipet dhe me të drejtë pyetja që ngrihet nga të gjithë është: a duhet të luajë De Vrij apo jo?
Dyshimet
Për të vendosur nuk është e lehtë. Është një ndeshje që ka vlerën e një finaleje. Nëse De Vrij luan dhe Lacio fiton, atëherë do t’i shtonte vetes meritën që dërgoi në Ligën e Kampionëve një skuadër që e nisi pa shumë pretendime këtë kampionat. Por, nga ana tjetër do të vetëpërjashtohej nga pjesëmarrja në skenën më të madhe të futbollit europian, Champions League.
Pino Wilson, kapiteni i Lacios që ka fituar skudeton e parë e sheh si një vendim tejet delikat. “Për mua, i vetmi që mund të vendosë dhe që duhet të pyetet për këtë është vetë De Vrij. Cilido qoftë vendimi i tij, duhet respektuar. Nëse ka mëdyshjen më të vogël, atëherë të isha në vend të Simone Inzaghit nuk do ta aktivizoja”, këshillon ai.
Wilson fajëson pjesërisht edhe vetë mbrojtësin holandez për këtë situatë në të cilën ndodhet. “Përflitet prej muajsh që ndeshja e fundit e kampionatit mund të ishte vendimtare për të dyja skuadrat. De Vrij mund të priste fundin e sezonit dhe pastaj të nënshkruante, ose të paktën t’u kishte kërkuar drejtuesve të Interit që të mos e publikonin lajmin”, shton ai.
Një mendim të ngjashëm ndan edhe Sebastiano Siviglia, ish-lojtar i Lacios nga viti 2004 deri në 2010. “Po luan mirë në javët e fundit, por në ndeshjen ndaj Interit do të jetë në një presion të madh. Për këtë, Inzaghi duhet të vlerësojë me kujdes dhe të kuptojë nëse De Vrij është i qetë e i gatshëm për të luajtur në një sfidë të tillë. Është e qartë se një gabim i vogël do t’i vërsulte kritika të rënda. Megjithatë, unë personalisht besoj se ai është një profesionist dhe nëse psikologjikisht është i bindur, duhet të luajë, në të kundërt, jo”, thotë ai.
Besimi
Ka nga ata që besojnë tek lojtari. Njëri prej tyre është Vincenzo D’Amico, një tjetër ish-lojtar i Lacios kampione të vitit 1974. “Ajo ndeshje do të presë biletën e De Vrij për në Milano. Do të jetë prezantimi me shokët e rinj, tifozët e rinj, drejtuesit e rinj dhe të shfaqej si i pandershëm, do ta penalizojë në të ardhmen. Në Milano do të mendonin se nuk mund t’i besohet dhe me të drejtë. Unë jam i bindur që ai do të japë maksimumin”, thotë ai.
D’Amico dhe Wilson bien dakort plotësisht në një gjë; dyshimi që lajmi i blerjes së tij prej “zikaltërve” nuk ka dalë rastësisht tani.
“Ta mendosh të qëllimshme pa prova duket e guximshme, por dyshimet janë. Kush na siguron që lajmi nuk doli për të pështjelluar ambientin bardhekaltër në këtë fund sezoni”, pohojnë ata.
Tifozët
Edhe ata janë të ndarë! Në radiot lokale të Lacios mendimet që mbërrijnë janë të ndryshme. “De Vrij është mbrojtësi më i mirë që kemi në skuadër dhe nëse do të jetë i shpërqendruar, duhet të luajë”, thotë një tifoz i Lacios.
“Rrezikojmë shumë me aktivizimin e tij! Na tradhtoi një herë duke vendosur që të largohet nga klubi, mund ta bëjë sërish”, shton një tjetër.
Kokë a pil? Ai që vendos është Simone Inzaghi dhe nuk do të jetë e lehtë për të.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
