.png)
Gazeta Si - Ish-zv.kryeministri Arben Ahmetaj ka reaguar sërish nga arratia në rrjetin social Facebook sa i takon hetimit të SPAK ndaj tij për çështjen e inceneratorëve.
Ai thotë se firma ligjore amerikane “Nixon Peabody” ka hartuar raportin e përmbledhur në 38 faqe, ku sipas Ahmetajt, ekspertët i konsiderojnë akuzat e ngritura ndaj tij si sulme të orientuara politikisht.
Ish-numri dy i qeverisë shton po ashtu se këtë raport ia ka dërguar Ministrit të Drejtësisë, Kryetares së Kuvendit, kryeinspektorit Artur Metani si dhe disa përfaqësive të huaja të shteteve që kanë kontribuar për reformën në drejtësi në vendin tonë. Ahmetaj ka përsëritur se akuzat ndaj tij janë sulme politike.
LEXO EDHE:
- I pandehur për dosjen ‘Buka’/ Ahmetaj reagon nga arratia dhe ironizon Ramën: Gjithçka mund të ndodhë, jetojmë në Tiranë
- Statuset nga arratia, SPAK i kërkon ndihmë Facebook-ut për të zbuluar vendndodhjen e Arben Ahmetajt
Kjo nuk është hera e parë që Ahmetaj reagon nga arratia përmes rrjeteve sociale.
Për të zbuluar vendndodhjen e ish-zv/kryeministrit Arben Ahmetaj, i shpallur në kërkim ndërkombëtar për aferën e inceneratorëve, SPAK i ka kërkuar ndihmë rrjetit social Facebook.
Konkretisht, Prokuroria e Posaçme, pas reagimeve përmes rrjeteve sociale të Ahmetajt në ditët e fundit, ka kërkuar informacion kompanisë META, që zotëron Facebook-un mbi lokacionin e Ahmetajt.
POSTIMI I AHMETAJT:
Në vazhdën e persekutimit politik për më shumë se një vit e gjysëm, të vazhduar e orientuar në media (të financuara nga inceneratorët) dhe në institucionet e akuzës, u detyrova të kërkoja një Opinion të dytë të pavarur (Indipendent Second Opinion) nga një firmë ligjore ndërkombëtare me qendër në SHBA.
Firma ligjore “Nixon Peabody” mori në shqyrtim të gjithë raportin e SPAK paraqitur në kërkesën që ky i fundit dorëzoi në Kuvend për heqjen e imunitetit parlamentar. Firma ligjore “Nixon Peabody” pas disa muajsh punë me bashkëpunëtorë me eksperiencë të fushës (ish-prokurorë federalë, apo ish-investigatorë të institucioneve ligjzbatuese amerikane) kanë prodhuar një raport të gjatë prej 420 faqesh duke u bazuar në standardet ndërkombëtare, prezumimin e pafajësisë dhe të drejtat themelore të njeriut.
Në raport ka dhe një përmbledhje prej 38 faqesh, ku bie në sy një nga konkluzionet e “political motivation or others…”, pra sulme te orientuara politikisht, për akuzat e ngritura ndaj meje, përmbledhje e cila mund të lexohet lehtësisht nga kushdo i interesuar.
Këtë raport ia kam dërguar Ministrit të Drejtësisë, Kryetares së Kuvendit, Kryeinspektorit Metani, si dhe disa përfaqësive të huaja të shteteve dhe institucioneve që kanë kontribuar në reformën në drejtësi.
Më poshtë kam atashuar linkun e materialit të plotë, i cili është lehtësisht i aksesueshëm.
Tashmë nuk kam më as habi, e as çuditem nga goditjet e orientuara, të kaluara, të tashme e të ardhme. Nuk kam çudi as nga standardet e aplikuara. Në të ardhmen e afërt do të komunikoj në detaje për akuza/supozime e përtej…
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
