.png)
Gazeta Si - Kreu i Partisë së Lirisë, Ilir Meta, ka thënë se pas masës së SPAK ndaj ish-kryeministri Sali Berisha për “detyrim paraqitje”, qëndron kryeministri Edi Rama.
Në një reagim në rrjetet sociale, Meta ka dënuar vendimin e GJKKO-së, e cila po heton në lidhje me procesin e privatizimit të ish-kompleksit “Partizani”, dosje për të cilën u arrestua mbrëmjen e të shtunës dhëndri i Berishës, Jamarbër Malltezi.
Sipas Ilir Metës, bëhet fjalë për një drejtësi me regji të urdhëruar nga Edi Rama, me synim të qartë për të shmangur vëmendjen nga korrupsioni i kësaj qeverie.
“Drejtësia me regji ka ndërmarrë veprimet e saj antikushtetuese dhe të paligjshme ndaj Kryetarit të Partisë Demokratike Prof. Dr. Sali Berisha me urdhër politik të Edi Ramës, - shkruan Meta. - Këto veprime, që kanë shkelur me këmbë edhe Parlamentin e Shqipërisë kërkojnë shmangien e vëmendjes nga korrupsioni dhe përgjegjësitë shumë të rënda personale të Edi Ramës për aferën e inceneratorëve dhe mjaft aferave të tjerave qindra milionëshe”.
Meta thekson se “qëllimi politik i vetëm është shantazhi dhe intimidimi i opozitës, e cila po denoncon me këmbëngulje të vërtetat shumë të hidhura të korrupsionit mafioz të Qeverisë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
