Mauro Ikardi po e shijon në maksimum çmimin “Golashënuesi më i mirë i sezonit 2017/2018”. Po e shijojnë edhe shokët e skuadrës, me një orë dhuratë. Kapiteni i Interit, me një postim në Instagram, e ka ndarë këtë arritje personale me gjithë skuadrën. Një dhuratë speciale për çdo lojtar, një orë “Rolex” mjaft e kushtueshme.
“Sigurisht që nuk do ta harroj kurrë këtë çmim, - shkruan Ikardi në faqen e tij në Instagram,- por nuk doja ta kujtoja i vetëm, sepse pa ju nuk do të ishte e mundur”. Dhuratë për të gjithë? Mungonin Rafinja dhe Kanselo, si dhe lojtarë të tjerë si Pinamonti, Lisandro Lopez, Nagatomo, Karamoh, Santon dhe Eder, të cilët janë larguar, por edhe Dalbert, Zhoao Mario dhe Galiardini, që nuk janë në Londër, sepse nuk janë në listën e Championsit. Por Ikardi ka dashur t’i sigurojë edhe këta për dhuratën speciale, duke shkruar: “Mos u shqetësoni, do të vijë edhe dhurata juaj”.
Mesazhi ështëi qartë: çmimet personale nuk mund të arrihen pa punën e skuadrës dhe ky mesazh i Ikardit, i ndarë edhe në rrjetet sociale, tregon se argjentinasi është gjithmonë e më shumë lider tek Interi, në fushë dhe jashtë saj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.