.png)
Vendimi i Gjykatës së Lartë për të prishur vendimin e Apelit të datës 3 mars dhe detyrimin po nga kjo gjykatë (me një tjetër trupë gjykuese) që të marrë vendim për vulën dhe siglën e PD nuk zgjidhi asgjë në themel.
Rithemelimi i Sali Berishës kishte kërkuar në rekursin e saj që të njihet vendimi i gjykatës së shkallë së parë dhe të mos legjitimohej si palë ankuese PD zyrtare e përfaqësuar nga Enkelejd Alibeaj sa kohë që nuk kishin qenë palë në gjykimin e shkallës së Parë kur u mor vendimi pro Rithemelimit dhe indirekt vetë drejtimit të partisë nga Berisha.
Ndryshe nga pretendimi i Rithemelimit, më herët Apeli njohu si palë ankuese ndaj vendimit të Zhukrit, Enkelejd Alibeajn i mandatuar (mars 2023) nga Basha si kryetar i përkohshëm PD-së.
"Së pari, lidhur me legjitimimin e ankuesit, nga faktet e përshkruara më sipër, Partia Demokratike Iegjitimohet në cilësinë e ankuesit, për të paraqitur këtë ankim dhe për t'u pranuar ky i fundit, në të dyja aspektet e legjitimimit, atë substancial dhe atë procedural”, thuhej në vendimin e Apelit
Por, në anën tjetër, Apeli njohu edhe Partinë Demokratike e përfaqësuar nga Komisioni i Rithemelimit, në cilësinë e kërkuesit
Kundrejt kësaj panorame, Gjykata e Lartë vlerëson se Apeli ka lejuar shkelje procedurale që e bëjnë të cenueshëm vendimin e dhënë prej saj.
Alibeaj në Apel kishte kërkuar prishjen e vendimit “Zhukri” ose kthimin e çështjes për shqyrtim në gjykatë, por me tjetër trupë gjykuese.
Rithemelimi kërkonte depozitimin në gjykatë të ndryshimeve statutore dhe vendimeve të Kuvendit Kombëtar të thirrur nga Berisha
Gjykata e Lartë ka vlerësuar se Apeli nuk i ka dhënë përgjigje kërkesave të palëve në ankimet respektive, duke vlerësuar se pretendimet e ngritura ishin çështje të cilat mund të zgjidheshin vetë nga ajo gjykatë.
Bazuar në këtë argument juridik, Gjykata e Lartër rrëzoi vendimin e Apelit, duke e kthyer çështjen sërish tek ajo Gjykatë.
Me vendimin ‘pa vendim’ Gjykata e Lartë e fut vulën e PD në një qorrsokak juridik dhe betejë procedurash ligjore që sido që të vendosë Apeli (kushedi se kur) e sigurt është që çfarë do vendimi që do marrë, do të hapë një tjetër odise ankimimesh nga Basha apo Rithemelimi i Berishës.
Me vendimin e sotëm, Gjykata e Lartë i ‘ledhatoi’ sedrën Berishës duke lënë indirekt në fuqi vendimin e Zhukrit të shkalles se Parë që njihte Kuvendin e Berishës (ku u shkarkua Basha si kryetar).
Në anën tjetër vendimi i la interpretim juridik edhe Bashës se nuk ka ndryshuar asgjë, se ai mbetet kryetar në regjistrin e partive politike, sa kohe që edhe pas vendimit të gjytarit Zhukri nuk u bë i mundur ç'regjistrimi i Bashës dhe për pasojë as zyrtarizimi i emrit të Berishës me dokumente si kryetar partie në gjykatë. Ky fakt e legjitimon atë edhe nëpër gjykata si palë zyrtare e PD
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
