Partia Demokratike e interpreton gjobën e vendosur nga ana e Policisë së Shtetit ndaj Lulzim Bashës për shkelje të masave anti-Covid si shembulli më i mirë se Edi Ramës i duhen masat e jashtëzakonshme dhe gjendja e fatkeqësisë natyrore për të shkelur liritë e qytetarëve dhe goditjen e opozitës dhe jo për të luftuar infeksionin.
“Ato kufizojnë të drejtat kushtetuese në mënyrë joproporcionale. Kreu i Opozitës dhe PD zhvilloi takime në qytetin e Durrësit me përfaqësues biznesesh, që po vuajnë pasojat e rënda të masave të pajustifikuara të Edi Ramës. Kryeministri po i mbyt bizneset, ndërkohe Opozita u qëndron pranë, merr mendimin e tyre dhe propozon masa për lehtësimin e vështirësive”, deklaroi ish-deputeti demokrat, Oerd Bylykbashi.
Bylykbashi thotë se shifrat e përhapjes së pandemisë në vendin tonë nuk e justifikojnë kufizimin e lirive themelore dhe gjobën ndaj Lulzim Bashës e cilëson si hakmarrje të pastër politike dhe përpjekje për të penguar aktivitetet e opozitës.
“Në veprim haptazi kundër opozitës politike ka gjobitur edhe kreun e PD dhe drejtuesit e degës së PD në Durrës për aktivitetin politik. Kjo është hakmarrje e pastër politike dhe pengim i aktiviteteve kushtetuese të Opozitës. Por nuk mund të mos jenë edhe qesharakë. Policia i heq lejet e drejtimit të automjeteve përfaqësuesve të Opozitës që kishin shkuar në këmbë në aktivitet. Kjo hakmarrje është qesharake, por edhe e kundërligjshme”, vijon Bylykbashi.
Ish-deputeti demokrat kërkon revokimin e këtyre vendimeve, në të kundërt paralajmëron se autorët do të përballem me akuzën e shpërdorimit të detyrës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.