.png)
Nga Gazeta ‘Si’- Protesta kundër projektit turistik në Zvërnec, e cila me kalimin e ditëve është shndërruar në një lëvizje më të gjerë anti-qeveritare dhe anti-establishment, hyn në javën e pestë.
Në të njëjtën kohë, kauza po merr një dimension të ri ndërkombëtar me mbërritjen në Shqipëri të një delegacioni të eurodeputetëve të grupit Greens/EFA.
Nga 29 qershori deri më 1 korrik, delegacioni i Parlamentit Europian do të zhvillojë një vizitë në Shqipëri dhe në zonën e mbrojtur të Vjosë-Nartës, ku pritet të takohet me komunitetet lokale, organizatat mjedisore, përfaqësues të protestës dhe autoritetet shqiptare
Vizita vjen vetëm pak javë pasi Parlamenti Europian miratoi raportin për Shqipërinë, ku përmes amendamentit 17 u shpreh shqetësim për ndryshimet në ligjin për zonat e mbrojtura dhe u kërkua pezullimi i ndërhyrjeve të reja deri në harmonizimin e plotë të legjislacionit shqiptar me standardet e Bashkimit Europian.
Edhe pse teksti i amendamentit nuk përmend projektin e Jared Kushner në Zvërnec apo Sazan, autorët e tij e kanë bërë të qartë se pikërisht zhvillimet në zonën e Vjosë-Nartës kanë qenë një nga arsyet kryesore të nismës.
Eurodeputeti austriak Thomas Waitz u shpreh se Parlamenti Europian “u rreshtua në krah të protestuesve dhe deltës së Vjosë-Nartës”, duke paralajmëruar se standardet mjedisore do të jenë pjesë e vlerësimit të Shqipërisë në procesin e negociatave për anëtarësim.
Ndërkohë, në Tiranë, protestat kanë hyrë në javën e pestë pa ndërprerje.
Çdo mbrëmje qindra dhe mijëra qytetarë mblidhen para Kryeministrisë në atë që organizatorët e kanë quajtur “Revolucioni i Flamingove”, një lëvizje që nisi si kundërshtim ndaj zhvillimit të projektit në Zvërnec dhe që gradualisht është shndërruar në një platformë më të gjerë me kërkesa politike, përfshirë dorëheqjen e kryeministrit Edi Rama.
Nga ana tjetër, qeveria ka hedhur poshtë akuzat e protestuesve.
Kryeministri Rama ka deklaruar se ende nuk ekziston një projekt përfundimtar apo leje ndërtimi për zhvillimin në fjalë dhe ka argumentuar se protesta është amplifikuar nga ajo që ai e ka cilësuar si një “ciklon digjital”, i lidhur me kundërshtarët politikë të Donald Trump, grupe anti-izraelite dhe aktorë të tjerë ndërkombëtarë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje