.png)
Gazeta Si - Nga kjo javë në qytetet holandeze Breda dhe Tilburg do të mund të konsumohet legalisht kanabisi për herë të parë në historinë e vendit.
Është një eksperiment i konceptuar nga qeveria në vitin 2017, i cili do të zgjasë katër vjet, për të kuptuar se si të legalizohet plotësisht konsumimi dhe prodhimi i marijuanës legale në Holandë.
Faza fillestare duhet të zgjasë 6 muaj, përpara se të përfshihen 11 komuna të tjera dhe të vazhdojë drejt një zgjerimi gradual.
Ndryshe nga ajo që mendohet zakonisht jashtë vendit, posedimi dhe shitja e kanabisit dhe produkteve që e përmbajnë atë, nuk janë të ligjshme në Holandë, por janë në një zonë gri, e cila duhet të kapërcehet falë eksperimentit të nisur këtë javë.
Konsumimi i kanabisit në Holandë nuk konsiderohet krim, megjithëse nuk lejohet në disa hapësira publike në shumë qytete.
Posedimi i tij, qoftë edhe në sasi të vogla, është ende i paligjshëm, por rrallë ndiqet penalisht falë një politike tolerance në fuqi që nga vitet 1970: udhëzimet e qeverisë thonë shprehimisht se, megjithëse është e paligjshme, mbajtja e deri në 5 gramë marihuana tolerohet.
Edhe prodhimi dhe shitja e saj në kafenetë e famshme të pranishme në shumë qytete holandeze (vende ku nuk shërbehet alkool dhe ku pihet marijuanë dhe konsumohen produkte të saj), konsiderohet vepër penale, por edhe kjo tolerohet nga autoritetet.
Rezultati është se shitja e kanabisit nuk ndiqet pothuajse asnjëherë penalisht, por kjo ka krijuar shtrembërime: kafenetë sillen nga jashtë si biznese të ligjshme, por mënyra se si i sigurojnë produktet e tyre nuk është e tillë, duke qenë se një pjesë e madhe e prodhimit të kanabisit menaxhohet prej kohësh nga bandat kriminale.
Me kalimin e viteve, kjo ka çuar në një rritje të krimeve të vogla dhe kontradikta të dukshme, të cilat qeveria shpreson t'i frenojë duke siguruar kafene me kanabis të kultivuar ligjërisht.
Në këtë mënyrë do të mundësohej përjashtimi i kultivuesve të paligjshëm dhe kontrolli më i madh i cilësisë së produktit.
Prodhimi për momentin do të kufizohet në disa ferma, kanabisi i të cilave do të duhet të kalojë kontrolle të rrepta, të cilat përfshijnë matjen e niveleve të THC (parimi psikoaktiv i kanabisit), përpara se të hidhet në treg.
Ndërkohë, grupe studiuesish të pavarur do të ndjekin eksperimentin me synimin për dekriminalizimin e mundshëm.
Ministri i Shëndetësisë, Ernst Kuipers e përcaktoi nismën si "një moment historik" për vendin që mund t'i jepte fund një politike "hipokrite dhe të palogjikshme".
Dekriminalizimi dhe legalizimi i prodhimit dhe konsumit të kanabisit në vende të ndryshme të botës, duke përfshirë vitet e fundit veçanërisht në Shtetet e Bashkuara, janë ende një temë e diskutueshme, por kanë treguar efekte pozitive në luftën kundër krimit dhe në cilësinë e produktit.
Megjithatë, krahasuar me kohën kur filloi politika e tolerancës në vitet 1970, Holanda është bërë më konservatore për këtë çështje, edhe për shkak të turizmit të lidhur me kanabisin që tolerohet gjithnjë e më shumë nga qytetarët holandezë, veçanërisht në Amsterdam.
Në vitet e fundit qyteti ka propozuar disa herë për të mbyllur kafenetë, të paktën për turistët dhe ka ndaluar pirjen e duhanit të marijuanës në disa rrugë të qendrës historike.
Eksperimenti i ri kërcënohet edhe nga popullariteti i kandidatit të ekstremit të djathtë, Geert Wilders, Partia e Lirisë e të cilit ishte më e votuara në zgjedhjet e fundit.
Programi i tij foli qartë për eliminimin e politikës së tolerancës dhe bërjen e drogës krejtësisht të paligjshme.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
