.png)
Këshilli i Ministrave ka miratuar në mbledhjen e rradhës Marrëveshjen ndërmjet Republikës së Shqipërisë dhe Bashkimit Europian për Ndihmën Makro-Financiare për Shqipërinë në shumën prej 180 milion euro.
Ministria e Financave bën me dije se në 25 maj 2020, Bashkimi Europian miratoi vendimin për të vënë në dispozicion asistencën makro-financiare drejt vendeve të Ballkanit Perëndimor dhe vendeve të zgjerimit të Europës Lindore në kontekstin e krizës nga pandemia COVID-19.
Sipas Financave, nga fondi i alokuar, Republika e Shqipërisë do të përfitojë asistencën makro-financiare prej 180 milion EURO në formën e një huaje të butë, me normë interesi 0.5% me kushtet aktuale të tregjeve financiare.
Kjo hua do të paraqitet në dy transhe të barabarta në buxhetin e shtetit.
Qëllimi i kësaj asistence, argumenton Ministria e Financave është lehtësimi i kufizimeve të financimit të jashtëm të vendit, lehtësimi i bilancit të pagesave dhe nevojat buxhetore, të forcojë pozicionin e rezervës valutore dhe të ndihmojë vendin të adresojë sfidat aktuale të jashtme dhe financiare.
Rishikimi i buxhetit nga Qeveria Shqiptare dhe Ministria e Financave dhe Ekonomisë ka synuar, sipas Financave, alokimin e fondeve në mbështetje të amortizimit të efekteve të COVID 19. Parashikimet afatmesme për indikatorët makroekonomikë dhe shpenzimet buxhetore synojnë një përfshirje më të gjerë sociale, mbështetje në procesin e rindërtimit ndihmë për shtresat në nevojë, dhe stimulim të ekonomisë në procesin e rimëkëmbjes.
Mbështetja nga Bashkimi Europian, shpjegojnë Financat është komplementare me burimet e tjera të siguruara nga institucionet financiare ndërkombëtare dhe donatorët bilateralë në mbështetje të stabilizimit ekonomik të vendit dhe reformave ekonomike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
