Fitorja spektakolare e një dite më parë në një Wembley të mbushur si kurrë më parë i ka dhënë kurajë boksierit britanik Anthony Joshua. Pasi mposhti në 7 raunde me K.O, Alexander Povetkin, britaniku duket në formën e tij maksimale me 22 fitore në po aq ndeshje.
Për mediet britanike pas kësaj fitore të bujshme, Joshua ka deklaruar: “Jam gati t’i sfidoj të gjithë. Kur them të gjithë kam parasysh edhe Deontay Wilder, nëse ai është i disponueshëm.”
“Më sillni edhe Tyson Fury. Do të përballem edhe King Kong, nëse ai është i disponueshëm. Nëse ndokush është vërtet gati të më luftojë, mjafton t’i bëjë një telefon Eddie Hearn dhe vetëm kaq mjafton”.
Edhe pse Joshua flet me gjuhën e tij, ashtu siç boksierët dinë të shprehen, përballja me Tyson Fury apo Deontay Wilder nuk është kaq e thjeshtë.
Për të shkuar deri tek një përballje si ajo që pamë në Wembley pak ditë më parë duhet shumë punë dhe një seri e gjatë negociatash. Boksieri britanik mund të ndeshet me të dy kundërshtarët e tij më të mëdhenj, Tyson Fury dhe Dillian Whyte, por sigurisht pas plotësimit të disa kushteve që të dy menaxherët e sportistëve do i parashtrojnë.
Por edhe pse do duhet të presin pak për një përballje të këtij kalibri, fansat e dinë mirë se një ndeshje e Joshua ia vlen, pasi spektakli është i garantuar. Një gjë e tillë ndodhi edhe në mbrëmjen e së dielës në Wembley në Londër, që do jetë një përballje boksi që do mbahet mend gjatë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.