Ne rrjet

BE hap kufijtë për shqiptarët në korrik

Pas më shumë se tre muajsh izolimi, Bashkimi Europian do të hapë kufijtë për shqiptarët dhe qytetarët e vendeve të treta në fillim të korrikut.

Ky hap ishte planifikuar të merrej në 15 qershor, por mosmarrëveshjet mes vendeve anëtare kanë çuar në shtyrjen e këtij vendimi. Tanimë BE pritet të hapë plotësisht kufijtë e brendshëm deri në fund të qershorit dhe do të fillojë heqjen e kufizimeve për udhëtimin për vendet e tjera në korrik.

Lajmi u bë i ditur nga Komisionerja e Çështjeve të Brendshme të BE, Ylva Johansson, e cila tha se

në një konferencë shtypi pas një telefonate në mes të ministrave të brendshëm të BE-së se zona Shengenit do të rikthehej në jetë “në fund të qershorit”.

Pandemia COVID-19 çoi në mbylljen e kufijve në të gjithë BE me përjashtime shumë të kufizuara, siç ishin “korridoret e gjelbra” për drejtuesit e kamionëve. Ndërkohë që afrohet sezoni turistik, disa kombe, përfshirë Italinë, Francën dhe Belgjikën, kanë njoftuar rihapjen e kufijve dhe me më shumë kombe europiane, përfshirë Gjermaninë kanë vendosur të hapin kufijtë me vendet fqinje 15 qershor. Italia e bëri këtë të mërkurën. Por, përkundër përpjekjeve për t’u koordinuar, hapja e kufijve po ndodh në nivelin kombëtar.

Terezija Gras, Sekretarja e Shtetit në Ministrinë e Punëve të Brendshme të Kroacisë, i cila kryesoi takimin në emër të Presidencës Kroate të Këshillit, tha se heqja e kontrolleve të kufijve të brendshëm ishte “një qëllim i përbashkët”.

Megjithatë, ajo tregoi se nuk kishte një vendim unanim. Shumica e vendeve donin që kontrollet kufitare të qëndronin në fuqi deri më 15 qershor, dhe disa të tjerë në fund të qershorit, në varësi të situatës epidemiologjike në disa shtete anëtare.

“Hapja e kufijve të jashtëm do të koordinohet gjithashtu me ECDC, Qendrën Europiane për Parandalimin dhe Kontrollin e Sëmundjeve”, tha Gras, duke shtuar se Komisioni do të propozojë javën e ardhshme udhëzime për hapjen e kufijve të jashtëm.

Aeroporti i Romës

Edhe pse shumica e vendeve europiane kanë kërkuar hapjen  e kufijve për turistët, disa prej tyre i kanë hapur vetëm me fqinjët, ndërsa të tjera kanë vendosur karantinë dy javore për të gjithë udhëtarët.

Greqia
Kufijtë e Greqisë pritet të hapen më 15 qershor, por vetëm për qytetarët që vijnë nga Gjermania, Izraeli, Qipro dhe Shqipëria dhe vendet e Ballkanit. Pasagjerët do të mund  të hyjnë në Greqi pa u testuar për Covid-19, ndërsa fluturimet ndërkombëtare pritet të fillojnë më 1 korrik.

Hungaria

Kufijtë me Rumaninë janë të hapura, ndërsa nga e mërkura do të hapen kufijtë me Sllovakinë, Çekinë, por me disa kufizime.

Italia ka planifikuar të rihapë kufijtë me BE më 3 qershor, Mbretërinë e Bashkuar, zonën Schengen, Andorrën dhe Monakon. Disa rajone kanë marra masa paraprake për t’u siguruar se rihapja nuk do të shkaktojë një valë të re infektimesh. Guvernatori i Sardenjës ka sugjeruar se mund t’i kërkojë udhëtarëve që të certifikojnë se janë negativ për coronavirus, ose të paktën të testohen me të mbërritur në vend.

Holanda -Kufijtë janë të hapur për personat që udhëtojnë nga zona e Schengenit, por qeveria ka kërkuar që të shmangen udhëtimet jo të domosdoshme.

Portugalia do të qëndrojë i mbyllur për turistët të paktën deri në 15 qershor. Kontrollet në pikat kufitare janë në fuqi që prej 16 marsit dhe deri më tani është kërkuar vetëkarantinim për të ardhurit. Kryeministri Eduardo Cabrita është shprehur se ende nuk ka një vendim për kohën se kur do të hiqen kufizimet.

Rumania ka rihapur kufijtë me Hungarinë, ndersa Sllovenia ka rihapur kufijtë për qytetarët e BE në 15 maj. Kryeministri Janez Jansa ka deklaruar se vendi ka “situatën më të mirë klinike në Europë”.

Sllovakia

Të mërkurën, kufijtë e Sllovakisë u hapën me Hungarinë dhe Çekinë, por me disa kufizime. Karantina nuk është e nevojshme për pasagjerë që qëndrojnë më pak se 48 orë.

Spanja

Kufijtë e vendit do hapen për turistët më 1 korrik. Aktualisht, në vend lejohet vetëm hyrja e qytetarëve spanjoll ose me vendbanim në Spanjë. Për këtë bën përjashtim personeli diplomatik dhe të gjitha profesionet që kanë të bëjnë me transportin e mallrave. Aktualisht, personat që hyjnë në territorin kombëtar nga jashtë duhet të vetizolohen për 14 ditë, një masë që do të zgjasë deri më 1 korrik sipas zyrtarëve.

Austria

Austria ka mbyllur kufijtë tokësor me Gjermaninë, Italinë, Zvicrën, Lihtenshtejnin, Sllovakinë dhe Republikën Çeke. Vjena ka planifikuar që të rihapë kufijtë me Gjermaninë më 15 qershor. Kancelari Sebastian Kurz u shpreh se ndihet optimist që do të ketë një mirëkuptim të përbashkët me vendet e tjera fqinje në javën e ardhshme. Për personat që do të mbërrijnë në Austri do të duhet një certifikatë mjekësore e cila duhet të vërtetojë se pasagjeri nuk është mbartës i Covid-19, por jo më e vjetër se 4 ditë.

Hyrja në rrugë ajrore është e ndaluar për qytetarët jashtë zonës së Schengenit

Kufijtë e Belgjikës janë të mbyllura dhe vendi ka ndaluar udhëtimet jo to domosdoshme.

Bullgaria do të hapë kufijtë me Serbinë dhe Greqinë më 1 qershor.

Kroacia ka rihapur kufijtë me Slloveninë në mesin e majit dhe pritet të bëjë të njëjtën gjë me Austrinë, Çekinë, Hungarinë dhe Sllovakinë më 29 maj.

Pasagjerëve iu është kërkuar të vetizolohen për 14 ditë nëse kanë pasur kontakt me persona të infektuar me Covid-19.

Qipro ka prezantuar një plan të detajuar për nisjen e fluturimeve prej një sërë vendesh të cilat kanë një numër të ulët të infektuarish.

Ministri i Transportit Yiannis Karousos tha se fluturimet do nisin në dy faza, më 9 dhe 20 qershor, prej dy grup shtetesh të përzgjedhura nga këshilli i ekspertëve mjekësor.                  

Në grupin e parë hyjnë Greqia, Malta, Bullgaria, Norvegjia, Austria, Finlanda, Sllovenia, Hungaria, Izraeli, Danimarka, Gjermania, Sllovakia dhe Lituania. Në grupin e dytë bëjnë pjesë Zvicra, Polonia, Rumania, Kroacia, Estonia dhe Çekia.

Duke nisur nga 20 qershori, pasagjerët e grupit të parë nuk do të kenë nevojë të pajisen me certifikatë mjekësore, por vetëm për ata të grupit të dytë.

Çekia nga 26 maji do të hapë kufijtë me Gjermaninë dhe Austrinë, ndërsa më 27 maji do të hapë kufijtë me Sllovakinë dhe Hungarinë, por një pjesë e kufizimeve do të qëndrojnë në fuqi.

Të gjithë pasagjerët do të duhet të kryejnë testin e Covid-19 në momentin e hyrjes në shtet.

Danimarka

Kufijtë do të qëndrojnë të mbyllur për pasagjerët e huaj dhe hyrja do të lejohet vetëm për banorët e Danimarkës, Groenlandës dhe Ishujve Faroe. Ndërkohë, pritet që në 29 maj qeveria daneze të rishqyrtojë kontrollet në pikat kufitare.

Franca

Kufijtë do të qëndrojnë të mbyllur të paktën deri më 15 qershor, ku përjashtim përbëjnë qytetarët nga Andorra, Mbretëria e Bashkuar, Islanda, Lihtenshtejni, Monako, Norvegjia, Zvicra, San Marino dhe Vatikani, por që janë me vendbanim në Francë. Hyrja e pasagjerëve që vijnë jashtë vendeve të BE nuk do të lejohet.

Gjermania

Udhëtarët do të duhet të kenë një arsye të vlefshme për të hyrë në Gjermani, megjithatë kufizimet në kufi janë lehtësuar. Kontrollet në pikat kufitare me Austrinë, Zvicrën, Francën dhe Danimarkën si dhe pasagjerët e ardhur nga Italia dhe Spanja do të qëndrojnë në fuqi deri më 15 qershor.

Suedia

Suedia ka mbajtur masat kufizuese në kufi, por kjo vlen vetëm për udhëtimet jo të domosdoshme nga vendet jashtë BE, me përjashtimin e Mbretërisë së Bashkuar dhe Zvicrës. Kjo masë ka hyrë në fuqi më 19 mars dhe është shtyrë deri në 15 qershor.

Zvicra

Masat kufizuese kanë hyrë në fuqi më 13 mars, por vendi do të hapë kufijtë me Gjermaninë, Austrinë dhe Francën më 15 qershor, në varësi të situatës. Kufizimet me Italinë do të qëndrojnë në fuqi deri në një lajmërim të dytë.

Personat që kërkojnë të hyjnë në Zvicër, por pa dokumentacion të rregullt qëndrimi ose pune, nuk do t’iu lejohet hyrja. Autoritetet zvicerane nuk kanë kërkuar vetëizolim për personat që hyjnë në vend, por udhëtarët do të duhet të zbatojnë rregullat e higjienës dhe distancimit social.

Mbretëria e Bashkuar.

Aktualisht kufijtë janë të hapura. Nga 8 qershori, udhëtarët do të duhet të vetizolohen për 14 ditë.  Ashtu si në disa vende të tjera, disa profesione janë të përjashtuara nga këto masa si për shembull punonjësit e shëndetësisë që udhëtojnë për të dhënë ndihmë. Në momentin e mbërritjen, ata që duhet të vetizolohen duhet të dorëzojnë të dhënat e udhëtimit dhe kontaktit. Qeveria ka lajmëruar se këto masa do të rishikohen çdo 3 javë.

Ky material nuk lejohet të kopjohet, apo riprodhohet pa miratimin e Gazetës “Si”. Ai është pronë intelektuale e gazetasi.al dhe si i tillë mbrohet nga ligji

Më Shumë