Përfaqësuesi më i lartë europian për migrimin, Dimitris Avramopulos ka deklaruar se shpreson që liderët e BE-së do të rishikojnë vendimin për hapjen e negociatave me Shqipërinë dhe Maqedoninë e Veriut.
Avramopulos është shprehur se BE dhe Brukseli do të vazhdoje të përkrahë aspiratën e anëtarësimit në familjen europiane jo vetëm për Shqipërinë dhe Maqedoninë e Veriut por për të gjithë Ballkanin Perëndimor.
Këto deklarata Avramopulos erdhën në takimin vjetor të ministrave të drejtësisë dhe punëve të brendshme të Ballkanit Perëndimor dhe BE që u mbajt të hënën dhe të martën në Maqedoninë e Veriut.
Komisioneri foli edhe për vendosjen e agjentëve të FRONTEX në Shqipëri, duke theksuar se BE-ja e ka ndihmuar Shqipërinë për të shkatërruar rrjetet e kontrabandës dhe aktivitetet kriminale.
“Që nga maji i këtij viti, Agjensia Evropiane e Kufirit Kufitar ka vendosur ekipe në Shqipëri për të ndihmuar rojet kufitare shqiptare. Kur bëhet fjalë për sigurinë, BE-ja do të vazhdojë të mbështesë Ballkanin Perëndimor në forcimin e aftësive të tyre për të luftuar terrorizmin dhe për të parandaluar dhe luftuar kundër radikalizmit dhe ekstremizmit të dhunshëm. Puna jonë e përbashkët është duke dhënë fryte: sot ne jemi duke nënshkruar edhe tre marrëveshje të tjera për zbatimin e Planit të përbashkët të veprimit BE-Ballkan Perëndimor për kundër terrorizmin me Bosnjën dhe Hercegovinën, dhe Malin e Zi dhe Serbinë”, deklaroi ai.
Avramopoulos në fjalën e tij ndër të tjera ka theksuar se Ballkani Perëndimor ka qenë historikisht, politikisht dhe kulturalisht me qasje ndaj Evropës.
"E ardhmja e vetme e vërtetë dhe e ndjeshme për të gjithë rajonin e Ballkanit Perëndimor është Evropa - sepse ato janë pjesë e Evropës. Për kolegët në BE që janë në mëdyshje ose kanë frikë për këtë proces, unë i paralajmëroj ata se ata duhet të kenë më shumë frikë nga e kundërta dhe të largojnë partnerët tanë më të afërt. Për interesin e të gjithë Evropës që ky rajon historikisht i ndjeshëm bëhet në një të ardhme të afërt një model i bashkëpunimit, paqes, stabilitetit dhe zhvillimit. Dhe kjo duhet të mbetet një përparësi politike strategjike e BE-së. Shpresoj që liderët e BE-së do të rishqyrtojnë vendimin e tyre në mënyrë që të fillojnë bisedimet e pranimit me Shqipërinë dhe Maqedoninë e Veriut. Por mbi të gjitha, unë shpresoj dhe uroj që dita kur ky rajon të jetë pjesë e Bashkimit Evropian të vijë sa më shpejtë." tha Avramopulos.
Liderët e vendeve të Bashkimit Europian nuk arritën të marrin një vendim unanim për hapjen e negociatave me Shqipërinë dhe Maqedoninë e Veriut, më 18 tetor, duke e lënë këtë për një moment tjetër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.