.png)
Fituesja e 23 turneve, Serena Williams, ka mundur në tre sete tenisten rumune Simona Halep, e cila tashmë rrezikon fronin botëror. Serena ka luftuar fort, ka shtrënguar dhëmbët dhe ka treguar vlerat e saj. Me uniformën jeshile, që dy vjet më parë ka triumfuar në Melburn, ndërkohë që ishte në pritje të fëmijës, ajo ka eliminuar numrin 1 në botë, Simona Halep, që sheh tashmë t’i dridhet froni. Pas Maria Sharapovës, që u eliminua dje, nga “Australia Open”, në ditën e 8-të të turneut, largohet edhe numri 1 në botë.
Serena e fitoi me lehtësi setin e parë, që zgjati 20 minuta dhe u mbyll 6-1. Halep në setin e dytë tregoi krenarinë e saj dhe arriti të barazonte. Më i ekuilibruar ishte seti i tretë, ku Williams shfaqi më shumë dëshirë dhe fitoi. Amerikania synon të fitojë trofeun e 24-t në një turne, duke barazuar Margaret Court. “Për mua është një nder të jem sërish këtu dhe të luftoj, - tha Williams. – Është puna ime, është ajo që dua të bëj”. Në momentin e prezantimit ndodhi një episod interesant, që tregon se numri 1 në botë është Serena Williams. Kur spikeri tha numri 1, Serena hyri në fushë, por më pas u fut me shpejtësi brenda, pasi ishte radha e Simona Halep në fakt.
Japonezja Naomi Osaka dhe ukrainasja Elina Svitolina u kualifikuan të parat për në çerekfinale. Osaka mundi 4-6, 6-3 dhe 6-4 letonezen Anastasjia Sevastova, kurse Svitolina kaloi amerikanen Madison Keys 6-2, 1-6 dhe 6-1. Fitore me përmbysje për “japonezen e hekurt”, e cila i ka çuar në 11 sukseset e njëpasnjëshme në Grande Slam. Në çerekfinale Naomi Osaka do të përballet me Elina Svitolina, së cilës gjithashtu iu deshën tre sete për të eliminuar amerikanen Madison Keys. Momenti vendimtar i ndeshjes ishte gejmi i tretë i setit të tretë, ku u deshën 28 pikë dhe Madison Keys humbi 5 topa break.
Është kualifikuar edhe Karolina Pliskova, e cila i lejoi kundërshtares së saj Garbine Muguruza vetëm 4 gejme. Pliskova fitoi 6-3 dhe 6-1 në një ndeshje që zgjati vetëm 60 minuta. Nesër luhen dy çerekfinalet e para, Anastasia Pavlyuchenkova kundër Danielle Collins dhe Ashleigh Barty kundër Petra Kvitova.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
