Gazeta Si - Një ditë pas ngjarjes tragjike një ditë më parë, ku në plazhin e Vilë-Bashtovës në Rrogozhinë u mbytën babai dhe dy djemtë e tij të mitur, 13 dhe 15 vjeç, është arrestuar një person.
Ai është një 34 vjeçar nga Tirana, administratori i operatorit turistik që kishte marrë me qira nga Bashkia e Rrogozhinës atë pjesë plazhi në Vilë-Bashtovë ku ndodhi kjo ngjarje e rëndë.
Sipas policisë, i riu nuk ka plotësuar kushtet e sigurisë sipas kontratës të lidhur mes operatorit ekonomik dhe Agjencisë Kombëtare të Bregdetit (kontratë e miratuar nga Ministria e Turizmit).
“Policia e Shtetit apelon për të gjithë operatorët që kanë përfituar kontrata shërbimi përgjatë vijës bregdetare, që të ushtrojnë aktivitetin në përmbushje të detyrimeve për sigurinë e jetës së pushuesve dhe të marrin masa të menjëhershme për të përmirësuar edhe më shumë kushtet e sigurisë, pasi Policia e Shtetit nuk do të tolerojë në asnjë rast, shkelje të tilla që cenojnë sigurinë dhe jetën e pushuesve në plazhe”, thuhet në njoftimin e policisë.
Tre të mbyturit në Vilë-Bashtovë u nxorën nga deti me kajak nga një person që punonte në plazh.
Dëshmitarët nga vendi i ngjarjes treguan se panë një burrë që kishte ngritur duart dhe kërkonte ndihmë.
Por asnjë nga pushuesit nuk u fut në det, sepse kishin frikë nga dallgët e mëdha dhe aty mungonin vrojtuesit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.