A është kjo lidhja midis vaksinës AstraZeneca dhe mpiksjes së gjakut?

Shkencëtarët europianë besojnë se kanë një shpjegim për mpiksjen e gjakut të raportuar në një numër të vogël të njerëzve që morën vaksinën Oxford-AstraZeneca.

Dy ekipe të veçanta kërkimore në Gjermani dhe Norvegji zbuluan se doza mund të bëjë në raste shumë të rralla që trupi të sulmojë trombocitet e tij të gjakut, duke shkaktuar mpiksje vdekjeprurëse në tru. Ekspertët thanë se pacientët që kishin mpiksjen e trurit kanë të ngjarë të vuajnë nga dhimbje koke të forta, marramendje dhe humbje të shikimit në ditët pas vaksinimit.

Ata besojnë se gjendja mund të diagnostikohet me një test të thjeshtë gjaku dhe të trajtohet shpejt me ilaçe për hollimin e gjakut.

Ekipi gjerman, i cili bashkëpunoi me shkencëtarë në Mbretërinë e Bashkuar, Irlandë dhe Austri, tha se gjetjet e tij do të thotë që njerëzit nuk duhet të kenë frikë nga vaksina.

AstraZeneca ende pohon se mpiksjet nuk po ndodhin më shpesh sesa do të ndodhnin në popullatën e përgjithshme. Ekipet kërkimore nga Oslo dhe Universiteti Greifsëald besojnë se vaksina bën që trupi të prodhojë antitrupa, zakonisht të përdorura për të luftuar infeksionet ose patogjenët, të cilët “sulmojnë” trombocitet.

Për të kompensuar, trupi më pas prodhon shumë trombocite gjë që shkakton trashjen e gjakut dhe rrezikon mpiksjen. Ekspertët kanë pranuar se ata nuk e dinë pse po ndodh kjo.

Andreas Greinacher, profesor i mjekësisë së transfuzionit në Klinikën Universitare Greifsëald, tha se ekipi i tij do të paraqesë rezultatet për botim në revistën mjekësore britanike The Lancet në ditët në vijim.

Ekipi gjerman shqyrtoi nëntë raste të mpiksjes së gjakut të raportuara në Gjermani dhe Austri pasi morën vaksinën AstraZeneca.

Shtatë pacientë kishin trombozë venoze cerebrale (CVT), e cila është një mpiksje gjaku në tru, njëri kishte një emboli pulmonare dhe një kishte trombozë të venës splankike. Mostrat e gjakut nga katër prej individëve treguan se ata kishin të njëjtin lloj antitrupash që aktivizojnë trombocitet dhe fillojnë mpiksjen në HIT.

Këto mostra u krahasuan më pas me 20 individë të cilët morën vaksinën AstraZeneca dhe nuk kishin mpiksje gjaku. Askush nga ky grup nuk i ka këto antitrupa.

Studiuesit këshillojnë këdo që merr vaksinën AstraZeneca të mundohet të vërë re të gjitha mavijosjet, ënjtjet ose dhimbjet e kokës që fillojnë katër ose më shumë ditë pasi të bëjnë vaksinën.

Nëse personat që marrin vaksinën identifikojnë ndonjë nga këto simptoma herët, situata mund të trajtohet lehtësisht nga një mjek.

Ndërkohë, një grup studiuesish në Norvegji thonë se kanë studiuar tre raste të mpiksjes së gjakut pas vaksinimit me AstraZeneca.

Profesori Pål Andre Holme i Spitalit Universitar Oslo thotë se ai ka arritur në të njëjtin përfundim, që është për shkak të antitrupave që shkaktojnë një reagim të tepruar të vaksinës.

"Teoria jonë është se kjo është një përgjigje e fortë imune që ka shumë të ngjarë të vijë pas vaksinës", tha Holme.

Burimi: The Guardian. Përshtati: Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.