.png)
Sistemi Diellor mund të ketë një fund shumë më të hershëm nga sa kanë parashikuar shkencëtarët. Një studim i ri sugjeron se planetët e jashtëm, përfshirë Jupiterin, Saturnin, Uranin dhe Neptunin, mund të hidhen jashtë sistemit rreth një miliard vjet pasi Dielli të shndërrohet në një yll të bardhë.
Më parë, shkencëtarët mendonin se orbitat e këtyre planetëve do të mbeteshin relativisht të qëndrueshme për rreth një kuintilion vjet, përpara se ndikimi i yjeve që kalojnë pranë sistemit t’i destabilizonte.
Por kërkimi i ri paraqet një skenar tjetër.
Dielli, i cili është rreth 4.57 miliardë vjeç, pritet të vazhdojë të ndriçojë edhe për rreth pesë miliardë vjet. Më pas do të zgjerohet në një gjigant të kuq, duke zhdukur me shumë gjasë Mërkurin dhe Venusin dhe duke e bërë Tokën të pabanueshme. Në fund, Dielli do të humbasë pjesën më të madhe të masës dhe do të shndërrohet në një yll të bardhë.
Sipas studimit të ri, humbja e masës së Diellit nuk do të jetë domosdoshmërisht një proces i qetë. Shpërthimet dhe ndryshimet e rastësishme në masën diellore mund të ndikojnë në orbitat e planetëve të jashtëm, duke i bërë ato gjithnjë e më të paqëndrueshme.
Studiuesit përdorën qindra simulime numerike të sistemit diellor, duke modeluar ndërveprimet gravitacionale mes Diellit dhe katër planetëve gjigantë.
Rezultatet sugjerojnë se pas rreth një miliard vjetësh nga shndërrimi i Diellit në yll të bardhë, sistemi i jashtëm diellor mund të hyjë në një fazë kaotike dhe planetët gjigantë mund të përfundojnë duke u larguar nga Sistemi Diellor.
Megjithatë, ky është një skenar që i përket një të ardhmeje jashtëzakonisht të largët. Për Tokën, fundi do të vijë shumë më herët, kur Dielli të hyjë në fazën e gjigantit të kuq.
Studimi, i titulluar “Final Instability of the Solar System Induced by Stochastic Solar Mass Loss”, është publikuar në The Astrophysical Journal Letters.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje