Brenda një sezoni tre trajnerë, është një gjë shumë rrallë në futbollin europian, por për Superligën shqiptare është mëse normale. Pas Kamzës dhe Laçit, është radha e Luftëtarit që të provojë shanset në këtë kampionat me trajnerin e tretë brenda një sezoni.
Skuadra gjirokastrite ka arritur marrëveshjen me teknikun Julian Ahmataj, pas largimit të Gentian Mezanit dy ditë më parë. Tekinku 40-vjeçar ka gjetur gjuhën e përbashkët me drejtuesit e Luftëtarit dhe do të vihet në drejtimin e ekipit, duke filluar që nga dita e nesërme.
Edhe pse zyrtarizimi nuk është bërë ende nga të dyja palët, burime të Gazetës Si pranë trajnerit dhe klubit kanë konfirmuar arritjen e marrëveshjes. Nuk bëhen të ditura ende detaje të marrëveshjes, lidhur me shumën që do të përfitojë Ahmataj në Gjirokastër, por edhe kohëzgjatjen e saj. Pas sllovenit Milosh Kostiç dhe vlonjatit Gentian Mezani, Ahmataj do jetë i treti që do të provojë të mbajë Luftëtarin në Superiore.
Pritet që në ditët e ardhshme Ahmataj të bëjë edhe prezantimin zyrtar para skuadrës, por edhe para medieve. Kjo është aventura e radhës për Julian Ahmataj në drejtim të një ekipi në Superligë me misionin për ta shpëtuar. Vitin e shkuar elbasanasi ia doli që të shpëtojë Kamzën nga rënia, por drejtuesit nuk besuan tek ai dhe gjatë verës ai u largua.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
