.png)
Nga Gazeta ‘Si’- Kur temperaturat janë të larta dhe një mbrëmje vere duket e pamundur për t’u përballuar, shumë njerëz mendojnë se një dush me ujë të akullt është mënyra më e mirë për t’u freskuar dhe për të fjetur më shpejt. Por ekspertët thonë se kjo mund të ketë efektin e kundërt.
Sipas Mike Tipton, profesor i fiziologjisë humane dhe të aplikuar në Universitetin e Portsmouth, një dush shumë i ftohtë para gjumit nuk është zgjedhja ideale.
“Kur përpiqeni të flini, gjëja e fundit që dëshironi është të futeni në një dush me ujë të akullt”, shpjegon ai. Goditja e menjëhershme nga i ftohti bën që trupi të prodhojë adrenalinë dhe kortizol, hormone stresi që e mbajnë organizmin në gjendje gatishmërie, pikërisht e kundërta e asaj që nevojitet para gjumit.
Në vend të ujit shumë të ftohtë, një dush me ujë të vakët është më efektiv për të ulur temperaturën e trupit. Ai lejon qarkullimin e gjakut drejt lëkurës, ku nxehtësia mund të largohet gradualisht.
Kur trupi mbinxehet, enët e gjakut pranë sipërfaqes së lëkurës zgjerohen, duke sjellë gjakun e ngrohtë më afër sipërfaqes dhe duke ndihmuar në çlirimin e nxehtësisë. Por uji shumë i ftohtë shkakton reagimin e kundërt: trupi përpiqet të ruajë temperaturën duke ngushtuar enët e gjakut dhe duke reduktuar qarkullimin në lëkurë.
“Atëherë ajo që bëni është të bllokoni nxehtësinë brenda trupit”, thotë Tipton. Edhe pse më vonë nxehtësia do të largohet, procesi kërkon më shumë kohë.
Uji shumë i ftohtë mund të jetë i dobishëm në raste urgjente, si goditja nga nxehtësia, kur qarkullimi i gjakut është dëmtuar dhe trupi ka nevojë të ftohet shpejt. Por për freskim para gjumit, një dush i vakët është zgjedhja më e mirë.
Temperatura ideale ndryshon nga personi në person, por ekspertët sugjerojnë një ujë rreth 25-29 gradë Celsius, ndërsa një dush shumë i ftohtë zakonisht është nën 10 gradë Celsius./ The Guardian
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje