.png)
Temperaturat e larta të verës po e bëjnë gjithnjë e më të vështirë aktivitetin fizik në natyrë, ndërsa ekspertët paralajmërojnë se nxehtësia ekstreme jo vetëm që mund të rrezikojë shëndetin në afat të shkurtër, por mund të ndikojë edhe në mirëqenien afatgjatë duke i shtyrë njerëzit të lëvizin më pak.
Shqetësimi është aq i madh sa edhe organizatorët e Kupës së Botës 2026 në SHBA, Kanada dhe Meksikë kanë parashikuar pushime shtesë për hidratim gjatë ndeshjeve. Ndërkohë, me temperaturat rekord që pritet të shoqërojnë verën për shkak të fenomenit El Nino, shumë njerëz pyesin se si mund të vazhdojnë të ushtrohen pa rrezikuar shëndetin.
Sipas Christian Garcia-Witulski, epidemiolog, aktivitetet e zakonshme si ecja, çiklizmi apo ushtrimet në ambient të hapur bëhen dukshëm më të vështira dhe më pak komode kur temperaturat rriten. Megjithatë, shmangia e aktivitetit fizik për periudha të gjata mund të ketë pasoja serioze.
Një studim i fundit paralajmëron se ndryshimet klimatike dhe rritja e temperaturave mund të çojnë në uljen e aktivitetit fizik global, duke shkaktuar deri në 700 mijë vdekje të parakohshme në vit deri në vitin 2050.
Ekspertët rekomandojnë që ushtrimet të kryhen në orët më të freskëta të ditës, herët në mëngjes ose në mbrëmje. Edhe zgjedhja e vendeve me hije mund të bëjë diferencë të madhe, pasi sipërfaqet e ekspozuara drejtpërdrejt ndaj diellit mund të jenë deri në 15 gradë Celsius më të nxehta se zonat e mbrojtura.
Një faktor tjetër i rëndësishëm është lagështia e ajrit. Kur ajri është i lagësht, djersa avullon më ngadalë dhe trupi e ka më të vështirë të ftohet. Edhe mungesa e qarkullimit të ajrit mund ta rrisë stresin termik, duke e bërë ushtrimin më të rrezikshëm.
Në ditët shumë të nxehta, specialistët sugjerojnë uljen e intensitetit dhe kohëzgjatjes së aktivitetit fizik.
Në vend të një stërvitjeje intensive, një ecje më e shkurtër ose ushtrime të lehta brenda ambienteve mund të jenë një alternativë më e sigurt. Pushimet e shpeshta dhe qëndrimi në ambiente të freskëta gjatë tyre ndihmojnë gjithashtu në parandalimin e mbinxehjes së trupit.
Kur bëhet fjalë për ftohjen, ekspertët thonë se zhytja e duarve dhe parakrahëve në ujë të ftohtë ose hedhja e ujit mbi trup mund të jetë më efektive sesa përdorimi i pakove me akull. Një peshqir i lagur dhe i ftohtë mbi krahë, këmbë ose bust ndihmon gjithashtu në uljen e temperaturës së trupit.
Një tjetër strategji është ftohja paraprake përpara aktivitetit fizik. Konsumimi i ujit shumë të ftohtë ose i lëngjeve me akull mund të ulë temperaturën e trupit dhe të zgjasë kohën që një person mund të ushtrohet në mënyrë të sigurt në vapë.
Megjithatë, askush nuk është i paprekshëm nga efektet e vapës, madje as atletët profesionistë. Për këtë arsye, specialistët këshillojnë që njerëzit të dëgjojnë sinjalet e trupit dhe të ndalojnë menjëherë aktivitetin nëse shfaqin simptoma si marramendje, të përziera, lodhje e tepërt ose rrahje të shpejta të zemrës.
Sipas studiuesve, ndërsa valët e të nxehtit bëhen gjithnjë e më të shpeshta, aktiviteti fizik nuk mund të shihet më i ndarë nga klima. Sfida e së ardhmes nuk do të jetë vetëm të qëndrojmë aktivë, por edhe të mësojmë kur, ku dhe si të ushtrohemi në mënyrë të sigurt në një botë gjithnjë e më të nxehtë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje