.png)
Nga Gazeta ‘Si’- Është e vështirë të gjesh një fushë që nuk është prekur nga ndryshimet klimatike.
Valët e të nxehtit po bëhen gjithnjë e më të shpeshta dhe më intensive në mbarë botën, dhe sporti nuk bën përjashtim. Lojërat Olimpike Dimërore, turet e mëdha çiklistike dhe tani edhe eventi sportiv më i ndjekur në planet- Kupa e Botës 2026- pritet të ndikohen seriozisht nga ngrohja globale.
Sipas një studimi të realizuar nga shkencëtarët e organizatës World Weather Attribution, rreth 25% e ndeshjeve të Kupës së Botës 2026, që do të zhvillohet në SHBA, Kanada dhe Meksikë, mund të luhen në kushte që paraqesin rrezik për shëndetin e lojtarëve dhe tifozëve.
Nga 104 ndeshjet e planifikuara, 26 prej tyre pritet të zhvillohen në temperatura që tejkalojnë 26 gradë Celsius sipas indeksit WBGT (Wet Bulb Globe Temperature), një matës që përdoret në sport për të vlerësuar stresin termik mbi trupin e njeriut. Ky indeks nuk merr parasysh vetëm temperaturën e ajrit, por edhe lagështinë, rrezatimin diellor dhe shpejtësinë e erës.
Shkencëtarët paralajmërojnë se pesë ndeshje mund të kalojnë edhe pragun e rrezikshëm prej 28 gradësh WBGT- ekuivalent me rreth 38 gradë Celsius në vapë të thatë ose 30 gradë në kushte me lagështi të lartë.
Studimi krahason gjithashtu kushtet aktuale me ato të Botërorit të vitit 1994, i cili u zhvillua po në SHBA. Përfundimi është alarmues: rreziku nga temperaturat ekstreme pothuajse është dyfishuar për shkak të ndryshimeve klimatike të shkaktuara kryesisht nga djegia e lëndëve fosile. Sipas studiueses Joyce Kimutai, klima globale sot është rreth 0.7 gradë më e nxehtë se në vitin 1994.
Ndër ekipet që pritet të përballen me kushtet më të vështira është Portugalia, e cila ka një probabilitet prej 80% që të luajë të tre ndeshjet e fazës së grupeve në temperatura mbi 26 gradë WBGT. Pas saj vijnë Hollanda dhe Arabia Saudite.
Kampionia në fuqi, Argjentina, do të ketë gjithashtu sfida serioze. Në ndeshjen e 22 qershorit në Dallas ekziston 100% mundësi që temperatura të kalojë pragun prej 26 gradësh WBGT dhe 22% mundësi që të tejkalohet edhe niveli kritik prej 28 gradësh.
Ndërkohë, Spanja do të përballet me rrezik më të ulët: dy ndeshje në Atlanta kanë rreth 23% mundësi për temperatura të larta, ndërsa ndeshja në Guadalajara të Meksikës konsiderohet pothuajse pa rrezik.
Ekspertët bazohen në rekomandimet e sindikatës ndërkombëtare të futbollistëve FIFPRO, e cila e konsideron pragun prej 26 gradësh WBGT si të rrezikshëm dhe sugjeron ndërprerje për freskim gjatë ndeshjeve. Kur temperatura kalon 28 gradë WBGT, sindikata rekomandon shtyrjen e ndeshjeve.
Rreziku nuk kufizohet vetëm te lojtarët. Studiuesit paralajmërojnë se tifozët janë edhe më të ekspozuar, sidomos ata që qëndrojnë jashtë stadiumeve përpara ndeshjeve, shpesh pa mbikëqyrje mjekësore apo masa mbrojtëse.
Për herë të parë në historinë e Kupës së Botës, FIFA ka vendosur që çdo ndeshje të ketë pushime të detyrueshme për hidratim në mesin e secilës pjesë, pavarësisht temperaturës apo stadiumit ku luhet.
Megjithatë, ky vendim ka nxitur debat. Kritikët argumentojnë se ndeshjet mund të planifikoheshin në mbrëmje për të shmangur vapën ekstreme. Por interesat televizive dhe të drejtat miliardëshe të transmetimit e bëjnë pothuajse të pamundur shmangien e orareve të pasdites, të cilat garantojnë audiencë maksimale në Europë.
Sipas vlerësimeve, FIFA pritet të përfitojë rreth 3.9 miliardë dollarë vetëm nga të drejtat televizive të turneut. Pushimet për hidratim krijojnë gjithashtu hapësira të reja reklamimi me audiencë shumë të lartë, sidomos gjatë finales.
Përveç debateve ekonomike dhe sportive, një gjë duket e qartë: Kupa e Botës 2026 mund të hyjë në histori si Botërori i parë ku ndryshimet klimatike do të jenë po aq të dukshme sa vetë loja në fushë.
Burimi: El Pais/Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje