.png)
Një startup kinez ka ndezur debat të madh në internet pasi prezantoi një pajisje me inteligjencë artificiale që pretendon se mund të përkthejë lehjet e qenve dhe mjaullimat e maceve në fjali të plota njerëzore, me një saktësi të deklaruar prej 95 për qind.
Produkti, i zhvilluar nga kompania kineze PettiChat me bazë në Hangzhou, është një qafore inteligjente për kafshët shtëpiake, e cila sipas kompanisë mund të analizojë tingujt, emocionet dhe gjuhën e trupit të qenve dhe maceve.
Pajisja përdor mikrofonë, sensorë lëvizjeje dhe modele të inteligjencës artificiale për të interpretuar vokalizimet e kafshëve.
Sipas startup-it, teknologjia është ndërtuar mbi sistemin e inteligjencës artificiale Qwen të kompanisë kineze Alibaba Cloud dhe është trajnuar mbi miliona mostra të të ashtuquajturave “voiceprints” të kafshëve për të identifikuar modele komunikimi.
Ajo që e bën pajisjen edhe më futuriste është pretendimi se mund të “përkthejë” edhe të folurën e njerëzve në tinguj më të kuptueshëm për kafshët, duke krijuar një lloj komunikimi të dyanshëm mes pronarit dhe qenit apo maces.
Sipas kompanisë, sistemi mund të identifikojë emocione si entuziazmi, ankthi, trishtimi, uria apo afeksioni bazuar në tonin e zërit dhe lëvizjet e kafshës.
Qaforja inteligjente, e cila kushton 799 juanë (rreth 118 dollarë), ka marrë mbi 10 mijë porosi paraprake në një kohë të shkurtër dhe është kthyer në një nga pajisjet më të diskutuara me inteligjencë artificiale në rrjet.
Megjithatë, entuziazmi është shoqëruar edhe me skepticizëm të fortë.
Kritikët kanë vënë në dukje se kompania nuk ka publikuar studime shkencore, prova teknike apo kërkime të verifikuara që të mbështesin pretendimin për “95% saktësi”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje