.png)
Gazeta Si – Një fluturim i kompanisë “Air France” me destinacion Shtetet e Bashkuara u devijua për në Montreal, Kanada, pasi dyshohej se një pasagjer ishte ekspozuar ndaj virusit Ebola.
Avioni, i cili ishte nisur nga Parisi dhe po shkonte drejt Detroitit, u devijua pasditen e së mërkurës, më 20 maj, me kërkesë të autoriteteve amerikane.
Sipas Doganës dhe Mbrojtjes Kufitare të SHBA-ve (CBP), pasagjeri kishte hipur “gabimisht”, pasi kishte udhëtuar së fundmi në Afrikën Lindore, një zonë e prekur nga një shpërthim i Ebolës.
Ndalesa – “Për shkak të kufizimeve të hyrjes të vendosura për të zvogëluar rrezikun e virusit Ebola, pasagjeri nuk duhej të hipte në aeroplan”, shpjeguan autoritetet amerikane në një deklaratë.
CBP më pas i mohoi aeroplanit uljen në aeroportin e Detroitit, duke urdhëruar që të devijonte në Montreal, Kanada.
Autoritetet nuk kanë sqaruar nëse pasagjeri shfaqte simptoma në përputhje me virusin. Sipas faqes së specializuar të internetit “FlightAware”, avioni u ul në Montreal vonë pasditen e së mërkurës, 20 maj.
Pasagjeri u zbrit dhe u mor nën kujdes nga autoritetet shëndetësore, ndërsa pjesa tjetër e fluturimit vazhdoi më pas për në Detroit, ku mbërriti pak pas orës 8:00 të mbrëmjes sipas orës lokale.
Kufizimet – Incidenti vjen vetëm disa ditë pas futjes së kufizimeve të reja nga administrata amerikane. Më 18 maj, Qendrat për Kontrollin dhe Parandalimin e Sëmundjeve (CDC) dhe Departamenti i Sigurisë Kombëtare njoftuan një ndalim të përkohshëm 30-ditor udhëtimi për qytetarët jo-amerikanë nga Republika Demokratike e Kongos, Sudani i Jugut dhe Uganda.
Kontroll i zgjeruar shëndetësor është gjithashtu në vend për këdo që ka udhëtuar në ato vende në 21 ditët e fundit.
Reagimi – Kompania “Air France” konfirmoi se pasagjeri i përfshirë, ishte shtetas kongolez dhe iu mohua hyrja në Shtetet e Bashkuara.
“Sipas rregulloreve të reja, pasagjerët nga vende të caktuara, përfshirë Republikën Demokratike të Kongos, mund të hyjnë në Shtetet e Bashkuara vetëm përmes Aeroportit Ndërkombëtar të Uashingtonit (IAD)”, tha linja ajrore, duke shtuar se nuk ka ndodhur asnjë urgjencë mjekësore në bord.
Shpërthimi në Afrikë – Ndërkohë, Organizata Botërore e Shëndetësisë, e ka shpallur shpërthimin një emergjencë shëndetësore publike me shqetësim ndërkombëtar, duke shprehur shqetësim për përhapjen e shpejtë.
Sipas Drejtorit të Përgjithshëm të OBSH-së, Tedros Adhanom Ghebreyesus, 51 raste janë konfirmuar në provincat veriore të Kongos dhe dy të tjera në Ugandë. Ka 139 vdekje të dyshuara, ndërsa rastet e dyshuara po i afrohen shifrës 600.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje