.png)
Nga Gazeta Si- Ndërkohë që Ministri i Sportit Blendi Gonxhja deklaroi në shkurt se ligji i Sponsorizimit do të jetë në fuqi në 2027, ministri i Financave Petrit Malaj e kundërshton këtë ligj.
Në konferencën për mediet, kreu i FSHF-së, Armand Duka, foli edhe për Ligjin e Sponsorizimit.
Sipas tij drafti është dërguar në një diskutim publik dhe duhet vullnet politik që të shkohet më tej, diçka që nuk e kanë gjetur nga Ministria e Financave.
“Has një kundërshtim të madh nga Ministria e Financave, është absurde. Ku do shkojnë këto lekë thonë? Do të shkojnë tek fëmijët tanë që do të luajnë futboll, këto lekë buxheti dalin nga taksat tona. I vetmi mekanizëm mbetet Ligji i Sponsorizimit, mendoj që të jemi në finalizimin e tij, por nuk mund të flas me bindje. Jam kërkues i kësaj dhe jo vendimmarrësi”, tha Duka.
Ai shtoi se futbolli në Shqipëri do të ketë vështirësi financiare pa mbështetje dhe se është shumë e vështirë që të zhvillohet. Duka gjithashtu ka vërejtje edhe për draftin e qeverisë.
“Kemi bërë shumë takime, negociata, diskutime, së fundmi me ministrin e Sportit edhe pas Asamblesë, diku para 10 apo 15 ditësh. Qeveria e ka bërë një draft, e ka çuar për diskutim publik, padyshim që kemi shumë vërejtje edhe për atë draft”, thotë Duka.
Pasi Gonxhja dha lajmin se ligji do të hyjë në fuqi në 2027, Duka u shfaq në një takim me biznesmenin Samir Mane, duke i kërkuar që të investojë në një klub futbolli.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje