.png)
Gjigantët e mediave sociale morën vendime që lejonin më shumë përmbajtje të dëmshme në faqet e internetit të njerëzve, në ‘luftën’ për të fituar garën e algoritmeve.
Sinjalizues dhe persona të brendshëm kanë zbuluar për BBC-në se si kompanitë morën rreziqe me sigurinë për çështje që përfshijnë dhunën, shantazhin seksual dhe terrorizmin, ndërsa luftonin për vëmendjen e përdoruesve.
Një inxhinier në Meta, e cila zotëron Facebook dhe Instagram, përshkroi se si menaxhmenti i lartë i kishte thënë të lejonte më shumë përmbajtje të dëmshme “kufitare”- që përfshin mizogjininë dhe teoritë e konspiracionit- në faqet e internetit të përdoruesve për të konkurruar me TikTok-un.
“Ata na thanë në një farë mënyre se kjo është për shkak se çmimi i aksioneve ka rënë,” tha inxhinieri.
Një punonjës i TikTok i dha BBC-së akses të rrallë në panelet e brendshme të kompanisë të ankesave të përdoruesve si dhe prova të tjera se si stafi ishte udhëzuar të prioritizonte disa raste që përfshinin politikanë mbi një seri raportimesh për postime të dëmshme që paraqisnin fëmijë.
Po merreshin vendime për të “ruajtur një marrëdhënie të fortë” me figurat politike për të shmangur kërcënimet e rregulloreve ose ndalimeve, jo për shkak të rreziqeve për përdoruesit, tha punonjësi i TikTok.
Denoncuesit që folën për dokumentarin e BBC-së, ofrojnë një pamje nga afër se si reagoi industria pas rritjes shpërthyese të TikTok, algoritmi shumë tërheqës i të cilit për rekomandimin e videove të shkurtra përmbysi mediat sociale, duke i lënë rivalët të përpiqen të arrijnë ritmin.
Një studiues i lartë i Meta-s, Matt Motyl, tha se konkurrenti i kompanisë ndaj TikTok, Instagram Reels, u lançua në vitin 2020 pa masa të mjaftueshme mbrojtëse. Hulumtimi i brendshëm i ndarë me BBC tregoi se komentet në Reels kishin një prevalencë dukshëm më të lartë të ngacmimit, gjuhës së urrejtjes dhe dhunës ose nxitjes sesa diku tjetër në Instagram.
Kompania investoi në 700 punonjës për të rritur Reels, ndërsa ekipeve të sigurisë iu refuzua staf i specializuar për t’u marrë me mbrojtjen e fëmijëve dhe të tjerë për të ndihmuar me integritetin e zgjedhjeve, tha një tjetër ish-punonjës i lartë i Meta-s.
Motyl i dha BBC-së dhjetëra nga ato që ai i përshkroi si “dokumente kërkimore të nivelit të lartë që tregojnë të gjitha llojet e dëmeve për përdoruesit në këto platforma”. Midis tyre, ishin prova që tregojnë se Facebook ishte në dijeni të problemeve të shkaktuara nga algoritmi i tij.
Algoritmi u ofroi krijuesve të përmbajtjes një “rrugë që maksimizon fitimet në kurriz të mirëqenies së audiencës së tyre” dhe “grupi aktual i stimujve financiarë që krijojnë algoritmet që krijojmë nuk duket se është në përputhje me misionin tonë” për ta afruar botën, sipas një studimi të brendshëm.
Në përgjigje të pretendimeve të denoncuesve, Meta tha se “çdo sugjerim se ne qëllimisht amplifikojmë përmbajtje të dëmshme për përfitime financiare është i gabuar.”
TikTok tha se këto ishin “pretendime të sajuara” dhe kompania investoi në teknologji që parandalonte që të kishte përmbajtje të dëmshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje