.png)
Zyrtarët e shëndetësisë po përgatiten për një sezon të ashpër gripi në Europë, pasi një lloj i ri viral po përhapet “jashtëzakonisht herët” në të gjithë bllokun.
Autoritetet po zbulojnë raste të gripit tre deri në katër javë më herët se në dy vitet e fundit, sipas një raporti të ri nga Qendra Evropiane për Parandalimin dhe Kontrollin e Sëmundjeve (ECDC), e cila mbulon Bashkimin Europian, Islandën, Lihtenshtajnin dhe Norvegjinë.
Një lloj i ri i gripit A, i njohur si nënklada H3N2 K, po nxit përhapjen e virusit, tha agjencia.
Ndërsa ende nuk është e qartë se sa i rëndë do të jetë sezoni i ardhshëm i gripit në Europë, ECDC paralajmëroi se mund të jetë më keq se vitet e kaluara nëse marrja e vaksinës mbetet e ulët.
“Po shohim që zbulimet e gripit po rriten shumë më herët se zakonisht këtë vit, dhe kjo do të thotë se koha është kritike”, tha në një deklaratë Edoardo Colzani, ekspert i viruseve në ECDC.
“Vaksinimi tani është një nga mënyrat më efektive për të mbrojtur veten dhe ata përreth jush nga sëmundjet serioze këtë dimër”, shtoi ai.
ECDC rekomandoi vaksinimin “pa vonesë” për të moshuarit, gratë shtatzëna, njerëzit me probleme shëndetësore kronike ose sistem imunitar të kompromentuar, punonjësit e shëndetësisë dhe ata që jetojnë në kujdes afatgjatë ose në mjedise të tjera grupore.
ECDC tha gjithashtu se klinikat mjekësore dhe institucionet e kujdesit duhet të ndërmarrin hapa shtesë për të parandaluar dhe kontrolluar infeksionet, për shembull, duke përdorur maska në spitale dhe urgjenca.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
