Nga Gazeta ‘SI’ – Këshilli Bashkiak i Tiranës pritet të mblidhet ditën e martë, më datë 23 shtator për të hequr nga drejtimi i Bashkisë, Erion Veliajn.
Sipas burimeve të Gazetasi.al, socialistët i kanë dërguar një kërkesë të re Këshillit Bashkiak, duke i kërkuar shkarkimin e Veliajt, me argumentin se mungon prej 3 muajsh në detyrë.
Në kërkesën e dërguar, burimet e “SI” bëjnë me dije se është formuluar fjalimi i kryeministrit Rama në asamble. Raportohet se “rezistencë” ka bërë deri në fund Aldo Merkoçi edhe pse në fund ka firmosur. Ai ka kërkuar që në deklaratë të shënohet që Veliaj i ka shërbyer qytetit dhe fjalë të tjera për punën e tij të mirë, që socialistët e kanë pranuar.
Pas nisjes së procedurave nga Këshilli Bashkiak, do të jetë Këshilli i Ministrave që do të vendosë për shkarkimin e kryetarit të bashkisë. Pas kësaj, Veliaj do të ketë 15 ditë kohë ta ankimojë vendimin për shkarkim në Gjykatën Kushtetuese.
Këshilltarët socialistë të Bashkisë u vunë në lëvizje pasi kryeministri Edi Rama deklaroi në Asamblenë e PS-së, se kryeqyteti nuk mund të priste më asnjë ditë për punët që duhen bërë dhe njoftoi se do nisnin procedurat për shkarkimin e Veliajt. Ai gjithashtu, propozoi që në garë si kandidatja e PS-së për kryebashkiake të ishte Ogerta Manastirliu.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
