Nga Gazeta ‘Si’- Pak pas prezantimit të qeverisë së re nga kryeministri Edi Rama, lideri i Partisë Demokratike, Sali Berisha, ka reaguar për herë të parë, duke kritikuar ashpër qëndrimin e Ramës dhe duke e cilësuar atë si mbështetës të “teorisë së pushtetit të vazhdueshëm”.
Në fjalën e tij, Berisha u shpreh se Rama po përdor opozitën si një “stoli”, duke shfrytëzuar praninë e saj në Kuvend për të justifikuar vazhdimësinë në pushtet deri në vitin 2050, siç vetë kryeministri e deklaroi më herët.
“Edi Rama nxori sot teorinë e pushtetit të vazhdueshëm, e pushtetit permanent, praninë tonë e shfrytëzon si stoli,” tha Berisha, duke iu drejtuar deputetëve dhe demokratëve.
Berisha e quajti vendimin e kryesisë së PD-së për të hyrë në parlament si një “vendim jo i lavdishëm”, dhe shtoi se shumë demokratë kanë shprehur pakënaqësi ndaj tij. Ai theksoi nevojën për hapje të plotë ndaj anëtarëve të partisë dhe demokratëve.
Ai tha se prezenca e tij në Parlament është lufta me narkoregjimin që ka vendosur një nga censurat më të mëdha nëpërmjet mediave që kontrollon dhe shtoi se “Rama sot do ishte i kënaqur nëse ata do vendosnin dje të mos hynin në Parlament”
Gjithashtu, Berisha kritikoi rëndë përbërjen e parlamentit, të cilin e cilësoi si “narko-parlament”, duke akuzuar se në të janë përfaqësuar grupe kriminale dhe njerëz të përfshirë në skandale korruptive dhe kriminale
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
