.png)
Partia Demokratike ka kërkuar ndërprerjen e diskutimeve në Komisionin e Ligjeve për reformën territoriale dhe pritjen e përgjigjeve nga bashkitë për draftin e opozitës, i cili parashikon rritjen e numrit të bashkive në 100.
Gjatë mbledhjes së Komisionit, deputeti i PD-së Oerd Bylykbashi kërkoi që diskutimi të mos vijojë me procesin e votimit, pasi sipas tij projekti i opozitës është dërguar për konsultim te njësitë vendore.
“Mos votoni, është dërguar për konsultim projekti ynë”, u shpreh Bylykbashi.
Edhe deputetja e PD-së Jorida Tabaku ngriti shqetësimin për mungesën e konsultimit me Bashkinë e Tiranës.
Nga ana e PS, u tha se procedura është ndjekur njësoj, kurse në mbledhjen e ditës do të prezantohen gjetjet e konsultimit të pr.ligjit të socialistëve.
“Sot do të bëhet prezantimi i gjetjeve të konsultimit publik në funksion të pr.ligjit të PS. E kam ftuar sot Maznikun që të na bëjë një prezantim, t’i administrojmë dokumentet dhe t’ua shpërndajmë dokumentet, sepse më 5 tetor është diskutimi, miratimi në parim nen për nen dhe në tërësi. Nga Kuvendi i Shqipërisë, më është bërë me dije se pr.ligji juaj është nisur menjëherë. Pra, me të njëjtën procedurë siç e keni kërkuar ju”, tha kryetari Ulsi Manja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje